Ekipa PR Ramos-Horta apoia nesesidade bázika ba família vulnerável uma-kain 16 iha Uatulari

VIKEKE,  08 Setembru  2026 (TATOLI)—Xefe Suku Afaloikai, Postu Administrativu Uatulari, Munisípiu Vikeke, Cesário N. Pires, informa Prezidente Repúlika (PR), José Ramos-Horta liuhusi ekipa Unidade Servisu Sivíl no Asuntu Sosiál (SSSAS) apoia nesesidade bázika ba família vulnerável uma-kain 16 iha Suku Afaloikai.

“Foin daudaun ne’e ha’u-nia família vulnerável sira iha Suku Afaloikai ne’ebé ami Konsellu Suku sira tun halo identifikasaun direta ba uma-kain 16 ne’e. Husi  família sira-ne’e balun iha uma ida ema na’in-ida, balun na’in-rua no tolu ne’ebé sira-nia uma nia kondisaun grave no menus tebes ba ai-han. Nune’e, ita-nia PR Ramos Horta nia ekipa mai apoia hahán nesesidade bázika hanesan foos no mina ba sira hodi auguenta moris,”, Cesário ba TATOLI, iha Postu Vikeke Vila, Tersa ne’e.

Autoridade ne’e hatutan apoia nesesidade bázika ba família vulnerável kada uma-kain hetan mina bimóliu litru 5 no foos saka ida.

Nia subliña kona-ba ai-han autoridade ne’e sente sei di’ak, família sira buka sei han, maibé uma mak sai prioridade ba família vulnerável sira hodi hela.

Tan ne’e, nia husu husu PR Ramos Horta, Ministériu Solidaridade Sosiál no Inkluzasuan (MSSI), Vise Primeiru Ministru, Mariano Asanami Sabino, atu tau-matan ba família vulnerável uma-kain 16 iha Suku Afaloikai.

Nia lembra fali Uma Naroman ba Povu  (UNP) mak governu atuál la altera karik, Suku Afaloikai tau ona ba planu prioridade hodi konstrui uma UNP ba família vulnerável sira.

“Maibé, agora programa konstrui uma UNP ba ita-nia família vulnerável laiha, mosu fali Programa Uma Dignu, maibé to’o agora Programa Uma Dignu seidauk mosu de’it iha ha’u-nia suku. Tan ne’e, ha’u hakarak husu parte relevante sira atu tau-matan ba ita-nia família vulnerável hodi konstrui uma, atu sira bele hela iha uma dignu,” Cesário informa.

 Jornalista: Vitorino Lopes da Costa

Editór: Xisto Freitas da Piedade