Erupsaun vulkaniku foho Anak Krakatau la fó impaktu ba voo Denpasar-Dili
DILI, 08 Setembru 2026 (TATOLI)—Prezidente Autoridade Aviasaun Sivíl Timor-Leste (AACTL), Zezinho António Gusmão, informa katak akontesimentu erupsaun foho Anak Krakatau iha Indonézia la fó impaktu ba viajen voo Denpasar-Dili, tanba problema ne’e akontese de’it iha área estreitu sunda.
“Viajen voo entre Jakarta ba Surabaya no Bali mak iha problema tanba erupsaun ne’e akontese besik mós iha Aeroportu Internasionál Soekarno-Hatta, ne’e mak afeta voo hotu-hotu ne’ebé sai husi aeroportu ne’e kansela,” Prezidente AACT informa ba Agência Tatoli liuhusi telefónika, ohin.
Maibé, nia dehan, voo entre Denpasar (Bali) mai Timor no Malázia mai Timor ne’e situasaun normál, ne’ebé aviaun sira kontinua halo operasaun. Enkuantu atu hatene kona-ba bainhira mak erupsaun ne’e ramata entaun konfirma ba IGTL ne’ebé iha ligasaun ho BMKG Indonézia.
“Karik hakarak dalan alternativa sai husi Jakarta ne’e sira bele movimentu liuhusi terrestre (rai-maran) ho konvoiu (kereta api) husi Jakarta ba Surabaya mak semo fali husi Kuala-Lumpur mós di’ak, se lae husi Bali mós di’ak,” nia esplika.
Iha sorin seluk, Diretór Ezekutivu Empreza Aero Dili, Lourenço de Oliveira, mós hatutan tan katak akontesimentu erupsaun vulkaniku iha foho Anak Krakatau ne’e la fó impaktu ba Timor-Leste, tanba Aero Dili nia rute voo ne’e to’o de’it Denpasar (Bali).
“Ne’ebé voo Arero Dili nian husi Denpasar, Singapura no Malázia mai Dili laiha problema. Ita-nia operasaun kontinua hela hanesan baibain,” nia esplika.
Maibé, nia dehan, ohin dadeer voo iha Jakarta hahú semo ona (normaliza ona), ne’ebé aviaun hotu-hotu iha Jakarta kontinua halo operasaun hanesan baibain fali ona, maske paradu tiha durante loron tolu.
Enkuantu bazeia ba informasaun ne’ebé Agência Tatoli asesu iha portál Reuters katak ohin, loron tersa-feira (08 Setembru 2026) operasaun voo iha Jakarta hahú reativa fila-fali ona tanba Aeroportu Internasionál Soekarno-Hatta (CGK) loke ona fila-fali, hafoin espalamentu abu vulkániku husi foho Anak Krakatau hahú dook ona husi área Jakarta.
Maibé, ida-ne’e la signifika katak voo hotu-hotu iha kondisaun normál, tanba kompañia aviasaun sira sei presiza reorganiza fali sira-nia oráriu, tanba antes ne’e besik 3.000 voo mak hetan perturbasaun (kansela).
Tanba ne’e, sei iha posibilidade atraza, kanselamentu ka mudansa ba oráriu voo no aviaun balu ne’ebé antes ne’e tenki (atraka) para iha rai (grounded) mós sei presiza hetan inspesaun no verifikasaun molok sira kontinua fali voo.
Jornalista : Alexandra da Costa
Editór : Cancio Ximenes
