Kompañia abandona hikas obra eletrifikasaun iha Suku Uma-Ki’ik
VIKEKE, 08 Setembru 2026 (TATOLI)—Xefe Aldeia Ainauai, Suku Uma-Ki’ik, Postu Administrativu Vikeke Vila, Munisípiu Vikeke, Ciquito Pinto, informa daudaun ne’e projetu eletrifikasaun iha Suku Uma-Ki’ik liga bá Aldeia Ainauai empreza implementadór abadona hikas servisu durante fulan rua-resin.
“Ami haree empreza responsavél abandona ona servisu eletrifikasaun ba ami-nia aldeia Ainauai, komesa la servisu iha fulan-Jullu 2026 to’o agora (fulan-Setembru). Loron-loron ami hein ema la halo servisu. Uluk harii de’it ai-rin eletrisidade nian, maibé fiu mós seidauk dada,” Ciquito Pinto ba TATOLI, iha Postu Vikeke Vila, Tersa ne’e.
Autoridade ne’e konsidera empreza laiha responsablidade ba obra ne’ebé sira implementa tanba obra ne’e atu besik tinan rua, maibé komunidade seidauk asesu ba liña eletrisidade.
“Uluk abandona tiha, ami hamutuk ho komunidade halo konferénsia impresa, mak emepreza mai fali servisu, maibé agora abandona tan fali ona. Ami sente triste tanba tinan barak ami la asesu naroman, agora Governu loke tiha konkursu empreza sira bá tuir manán tiha, mai implementa obra la hotu-hotu,” nia haktuir.
Tan ne’e, nia husu parte relevante sira fó-atensaun ba empreza implementadór ba obra eletrifikasaun ba Suku Uma-Ki’ik atu povu bele asesu ba eletrisidade.
“Ami lamenta tebetebes ba aktu empreza Uca-Aba ne’ebé responsabiliza ba liña eletrisidade ba Suku Uma-Ki’ik. Tan ne’e, oportunidade ida-ne’e ami husu parte relevante sira fó xamada urjente ba empreza Uca-Aba hodi aselera obra,” nia sujere.
Iha fatin ketak, Koordenadór Eletrisidade Timor-Leste, Empreza Públika (EDTL, E.P.), Eduardo Sarmento, hateten preokupasaun komunidade Suku Uma-Ki’ik nian ba obra eletrisidade ne’ebé empreza responsável abandona, parte EDTL Munisípiu Vikeke aprezenta ona ba nasionál hodi haree asuntu referidu.
“Preokupasaun ne’e ami aprezenta ona bá nasionál hodi bolu empreza implementadór. Ami mós tenta telefone direta ba empreza kuaze semana tolu ona, maibé númeru telemóvel empreza nian mate hela de’it,” nia haktuir.
Preokupasaun ne’e TATOLI Munisípiu Vikeke tenta konfirma ba diretór empreza responsável, maibé númeru telemóvel la ativu (mate) nune’e la konsege responde asuntu ne’e.
Entretantu, projetu eletrifikasaun ne’e lansada iha Fevereiru 2025. Projetu ne’e sei benefísia uma-kain 193 husi aldeia haat hanesan Raihun, Makadean, Maroman no Ainauain. Projetu referidu ho númeru kontratu 004/wk/EDTL, E.P 2025, ho kustu $247.903,60, ne’ebé responsabiliza husi empreza Uca-Aba Unip, Lda.
Jornalista: Vitorino Lopes da Costa
Editór: Xisto Freitas da Piedade
