Poonam rekoñese dezenvolvimentu ba setór saúde iha TL hahú di’ak
DILI, 08 Setembru 2026 (TATOLI)–Antiga Diretora Rejionál Organizasaun Mundiál Saúde (OMS), ba Sudeste Aziátiku, Poonam Khetrapal Singh, rekoñese progresu ba dezenvolvimentu ba setór saúde hahú la’o di’ak.
Nia dehan, vizita mai Timor-Leste ba da-haat no nia nota kada vizita sempre iha mudansa ne’ebé di’ak.
“Kadavés ha’u hetan katak Timor-Leste hadi’a iha dalan hotu-hotu ne’ebé posivel. Demografikamente, infraestrutura, sosiálmente la’o di’ak,” Poonam Khetrapal Singh hateten ba jornalista sira hafoin ramata enkontru ho Xefe Estadu, José Ramos-Horta, tersa ne’e.
Nia relembra fali katak, vizita dahuluk mai Timor-Leste iha tinan 2000 no iha tempu ne’ebá nia rasik hakfodak tanba ema barak fuma iha fatin públiku.
“Bainhira ha’u mai iha ne’e ba dala uluk, saida mak halo ha’u hakfodak tebes mak fuma ne’ebé akontese iha rai-laran. Motorista ne’ebé tula ha’u husi aeroportu ba otel ne’e fuma hela,” nia konta.
Maibé nia kontente haree progresu to’o agora, kontrolu tabaku iha Timor-Leste hetan ona melloria boot.
Poonam mós fó parabéns ba Timor-Leste ne’ebé konsege elimina moras barak ho apoiu husi Governu no povu.
Nia temi moras sarampu, rubéola, malária no trakoma ne’ebé konsege halakon.
“Ita bele halakon sarampu, rubéola, malária no agora trakoma halakon ona, di’ak duni ba povu Timor-Leste,” nia dehan.
Impresiona ho Serbisu iha Komunidade Antiga dirijente OMS ne’e mós impresiona ho serbisu iha nivel komunidade, liu-liu atendimentu ba inan no bebé sira.
Nia dehan, iha fatin lokál médiku oioin tuur hamutuk atu fó atendimentu no konsellu ba inan sira.
“Buat ne’ebé impresiona ha’u mak maneira oinsá komunidade ajuda malu. Serbisu ne’ebé hala’o iha nivel komunidade iha setór saúde,” nia esplika.
Nia agradese mós ba simpatia povu Timor-Leste ba médiku estranjeiru sira, inklui médiku Kubanu ne’ebé sente moris di’ak iha Timor-Leste.
Iha parte seluk, Poonam agradese ba Xefe Estadu José Ramos-Horta ne’ebé kondekora nia ho prémiu sivíl aas liu iha Timor-Leste.
“Ha’u agradese tebes ba Prezidente ne’ebé fó prémiu mai ha’u. Nia demokrátiku tebes, hanesan ita bele ko’alia ho nia hanesan ita ko’alia ho ema hotu,” nia dehan.
Jornalista : Hortêncio Sanchez
Editór : Cancio Ximenes
