Prezidente PN simu deputadu Japaun, diskute kooperasaun no investimentu

DILI, 08 Setembru 2029 (TATOLI) – Prezidente Parlamentu Nasionál (PN), Maria Fernanda Lay, simu audiénsia husi deputadu sira husi Japaun hodi diskute kooperasaun entre país rua iha área oioin.

Fernanda Lay hatete katak pedidu atu realiza enkontru ne’e mai husi Embaixada Japaun iha Timor-Leste, ho objetivu atu hasoru deputadu sira durante sira-nia vizita iha nasaun ne’e.

Nia realsa katak Timor-Leste no Japaun iha ona kooperasaun iha área oioin, liuliu iha prosesu dezenvolvimentu ne’ebé fó benefísiu ba Timor-Leste.

Durante sorumutu ne’e, deputadu Japaun sira mós husu apoiu husi Parlamentu Nasionál ba setór privadu Japaun ne’ebé sei halo investimentu iha estaleiru navál iha Manatutu.

“Sira espera Parlamentu bele apoia iha aspetu ne’e. Ami aproveita oportunidade atu agradese ba sira-nia apoiu depois ita integra iha ASEAN, liuliu ita-nia aeroportu [no] infraestrutura sira seluk ne’ebé presiza ramata antes simu prezidénsia ASEAN iha 2029”, nia hatete ba Tatoli hafoin enkontru iha Parlamentu, ohin.

Deputadu sira husi Japaun husu atu intensifika liután kooperasaun ne’ebé durante ne’e la’o ona entre país rua.

“Sira mós fó hanoin kona-ba traballadór ita-nia iha ne’ebá, estudante, no kooperasaun sira seluk ho grupu amizade. Espera katak bele intensifika hodi identifika di’ak liu asuntu saida mak Japaun no Timor-Leste [atu serbisu hamutuk]”, dehan.

Fernanda Lay mós husu apoiu Japaun nian ba konstrusaun Aeropotu Internasionál Nicolau Lobato iha Komoro, ne’ebé presiza finaliza molok Timor-Leste asume Prezidénsia ASEAN iha 2029.

“Espera ita-nia infraestrutura sira ramata hodi bele prezide duni. Se la’e aviaun boot mai labele tun iha ne’e”, nia salienta.

Enkontru ne’e akompaña husi Embaxadór Japaun iha Timor-Leste, Yasushi Yamamoto.

Jornalista: Nelson de Sousa

Editora: Maria Auxiliadora