Programa Hakoren benefísia grupu haat iha Suku Dilór
VIKEKE, 08 Setembru 2026 (TATOLI)—Xefe Suku Dilór, Postu Administrativu Lakluta, Munisípiu Vikeke, Jacinto Ximenes, informa implementasaun Programa Hakoren II benefísia tebes ba komunidade grupu haat iha Dilór hodi implementa depozita no impresta osan.
“Ha’u sente Programa Hakoren II ne’ebé implementa iha ami-nia Suku Dilór pertenente tebetebes tanba fó benefísiu ba ita-nia komunidade. Programa ne’e, ami hahú implementa iha tinan 2025 hamutuk ho parseiru rua hanesan Kruz Vermeila Timor-Leste (CVTL-sigla portugeza), Fundasaun Knua Haberan Komunidade (F-KHK), suporta husi doadór Catholic Relief Service (CRS) nune’e ami implementa hodi halo intervensaun ba komunidade ne’ebé enfrenta risku dezastre naturál sira iha ami-nia suku,” Jacinto Ximenes ba TATOLI hafoin hetan vizita husi CRS no MACP iha Suku Dilór, Segunda (07/09).
Autoridade ne’e aprofunda Programa Hakoren ne’e ninia objetivu atu halo intervensaun ba komunidade ne’ebé hasoru risku dezastre naturál hodi responde risku sira-ne’e iha Suku Dilór.
“Husi programa ne’e ami implementa atividade haat mak hanesan oinsá halo redusaun risku dezastre, atividade agrikultura kuda modo, atividade rai osan no impresta osan. Tan ne’e, ha’u hato’o agradese ba Autoridade Munisípiu Vikeke no parseiru sira-ne’ebé suporta ami ba implementa programa sira iha Suku Dilór,” nia hato’o.
Nia dehan programa ne’e mós apoiu ekipamentu hand tratór, makína fila-rai kantedeiru, apoia no makína ko’a hare ba agrikultór sira.
Programa Hakoren II hahú implementadu iha 2025 ho durasaun tinan tolu husi CVTL no F-KHK, servisu hamutuk ho Konsellu Suku Dilór forma grupu hamutuk haat mak hanesan Grupo Buka Rasik na’in 24 (feto na’in-21 mane na’in-3), Grupu GIHTL na’in-18 (mane na’in-5, feto na’in-13), Grupu Esperansa na’in-31 (mane na’in-11, feto na’in-20) no Grupu Nehek na’in-35 (mane na’in-15 no feto na’in-20).
“Ha’u sente programa ida-ne’e benefísia tebes ba komunidade tanba daudaun ne’e grupu sira komesa rai osan no impresta osan hodi apoia fali ba família uma-laran, grupu balun sira iha osan hamutuk rihun $5, balun rihun $3 no balun iha rihun $25. Ida-ne’e sai hanesan oportunidade di’ak ida ba ami Suku Dilór. Husi grupu sira-ne’e, iha fulan kotuk ami transforma ona ba kooperativa ida-ne’ebé ho totál membru ema na’in-39,” nia subliña.
Iha fatin hanesan, Reprezentante Prezidente Autoridade Munisípiu Vikeke atuál Sekretariu Asuntu Finansa no Administrasaun, Estevão de Carvalho haktuir, kona-ba Programa Hakoren ne’ebé parseiru F-KHK, CVTL no CRS implementa iha Suku Dilór parte Autoridade Munisípiu Vikeke apoia tebetebes tanba husi programa sira-ne’e bele tulun komunidade.
Entretantu, iha vizita komitiva Programa Hakoren ne’e partisipa husi parseiru sira hanesan CRS, CVTL, F-KHK, diretór servisu munisipál, autoridade lokál, membru grupu no komunidade Suku Dilór.
Jornalista: Vitorino Lopes da Costa
Editór: Xisto Freitas da Piedade
