STAE Baukau sei koloka funsionáriu kontratadu ba postu neen

BAUKAU, 08 Setembru 2026 (TATOLI)—Sekretariadu Tékniku Administrasaun Eleitorál (STAE) Baukau planeia sei koloka funsionáriu kontratadu hodi kompleta tan postu administrativu neen iha fulan-ne’e.

Diretór STAE Baukau, Natividade Freitas Guterres, esplika antes ne’e funsionáriu na’in-neen mak dezkola ona ba postu administrativu rua hanesan Baguia no Laga hafoin anunsia rezultadu teste iha inísiu tinan-ne’e.

“Foin mak ita koloka uluk iha Postu Baguia no Venilale. Atu halo atendimentu ba postu seluk, ita sei hein semana rua ka tolu tan, mak ita foin dezloka,” Natividade Freitas hateten iha ninia kna’ar fatin, Vila Nova, Baukau, Tersa ne’e.

Natividade Freitas relata funsionáriu na’in-24 ne’ebé rekruta kompostu husi pontu vokál, operadór no asistente, ne’ebé hetan ona formasaun iha fulan-Agostu 2026 husi ekipa nasionál iha-ne’ebé sei fasilita hakbesik atendimentu rejistu kartaun eleitorál ba komunidade.

Nia informa razaun seidauk koloka ba postu neen seluk tanba kestaun ekipamentu ne’ebé seidauk kompletu, relasiona prosesu transportasaun husi kompañia fornesedora ne’ebé kompra iha rai-li’ur hanesan blanku, ribon no laptop ne’ebé presiza atu halo rejistu identidade eleitorál iha sistema.

“Ami hein de’it. Se semana tolu ne’e ekipamentu kompletu ona, ami sei dezloka funsionáriu sira-ne’e ba postu,” Natividade akresenta.

Funsionáriu na’in-18 tuir planu sei kolokadu ba Postu Administrativu Kelikai, Kelikai Antigu, Matebian, Venilale, Vemasse no Baukau Vila hodi halo atendimentu ba eleitór sira.

Entretantu, funsionáriu na’in-24 mak sei hetan kontratu kompostu pontu vokál na’in-ualu, operadór sistema na’in-ualu no asistente operadór na’in-ualu ne’ebé sei destaka ba postu administrativu ualu iha Munisípiu Baukau.

Jornalista: Natalino Belo 

Editór: Xisto Freitas da Piedade