Timor-Leste no Northern Territory iha Relasaun Espesiál ne’ebé presiza hametin
DILI, 08 Setembru 2026 (TATOLI)–Ministra Prezidente Northern Territory, Austrália, Lia Finocchiaro, afirma katak Northern Territory no Timor-Leste iha amizade no relasaun espesiál ne’ebé presiza kontinua hametin.
Lia Finocchiaro hato’o asuntu ne’e hafoin hala’o enkontru ho Prezidente Repúblika José Ramos-Horta iha Palásiu Prezidensiál, Nicolau Lobato, Bairru Pite, tersa (08/09).
“Ha’u sente onra no priviléjiu boot atu mai iha Timor-Leste ohin. Northern Territory no Timor-Leste iha amizade no relasaun espesiál tebes,” nia hateten ba jornalista sira hafoin ramata enkontru.
Ministru Prezidente ne’e dehan, enkontru sir- ne’e hametin kompromisu hodi fó rezultadu di’ak ba povu rai rua ne’e.
Pontu importante ida mak kontinua dezenvolve forsa traballu no kapasidade iha Timor-Leste, no aumenta oportunidade ba traballadór timoroan sira atu servisu iha Northern Territory liu husi PALM Scheme.
“Aumenta mobilidade traballu ba Timoroan sira atu servisu iha Northern Territory mak buat ida úniku no espesiál tebes, no sai parte importante hosi relasaun ne’ebé ita iha,” nia afirma.
Nia mós garante katak traballadór Timoroan sira iha Northern Territory hetan respeitu no atende di’ak husi emlregadór sira.
“Traballadór Timoroan sira ne’ebé servisu liuhosi PALM Scheme iha Northern Territory hetan respeitu, simu sira nia saláriu, no ami simu sira ho di’ak,” nia subliña.
Lia Finocchiaro haktuir katak kooperasaun entre parte rua la’ós de’it iha área traballu.
Área seluk ne’e inklui saúde no edukasaun liuhusi Charles Darwin University, Menzies School of Health Research no Carers NT.
Doutór no médiku espesialista husi Timor-Leste mós halo ona formasaun prátika iha ospitál Northern Territory, agríkola no jestaun krokodilune’ebé sai prioridade estratéjika ba nasaun rua, turizmu no ekonomia ho planu konferénsia husi Property Council of the Northern Territory, no desportu liu-liu Rugby League ne’ebé hakarak kria oportunidade ba jogadór Timoroan.
“Ita kontinua servisu hamutuk iha projetu oioin no ha’u hakarak atu aumenta tan kooperasaun ne’e iha futuru,” nia dehan.
Nia dehan, maske ida-ne’e vizita dahuluk ba Timor-Leste maibé relasaun entre nasaun rua kle’ur ona no sei sai forte liután.
“Ita iha amizade ida ne’ebé kle’an no kle’ur ona. Ha’u fiar katak relasaun ne’e sei kontinua sai forte liután iha futuru,” nia dehan.
Jornalista : Hortêncio Sanchez
Editór : Cancio Ximenes
