Vise Assanami: Hasa’e kapasidade rekursu umanu sai prioridade kooperasaun ho Austrália
DILI, 08 Setembru 2026 (TATOLI)—Vise-Primeiru-Ministru no Ministru Koordenadór Asuntu Sosiál, Mariano Assanami Sabino, hala’o enkontru ho Ministra Xefe Territóriu Norte Austrália, Lia Finocchiaro, hodi diskute kona-ba esforsu hasa’e kapasidade formasaun rekursu umanu, inklui dezenvolvimentu kapasidade traballadór no mobilidade traballadór.
“Ohin ami ko’alia kona-ba hasa’e kapasidade formasaun rekursu umanu, no mós oinsá atu hametin no implementa desentralizasaun ne’ebé di’ak. Prioridade ida mak mobiliza ita-nia foin-sa’e sira atu servisu iha Northern Territory, tanba nia besik liu ho ita,” Vise-Primeiru-Ministru Assanami dehan ba jornalista sira iha Palásiu Governu, Tersa ne’e.
Vise Assanami hateten iha ona konkordánsia atu halo diskusaun kle’an liután kona-ba kooperasaun iha setór edukasaun, ensinu superiór no saúde.
“Northern Territory la’ós de’it parseiru importante ba ita, maibé mós hanesan família ida-ne’ebé besik liu ita. Tanba ne’e, ita presiza hametin liután komunikasaun no relasaun. Ita sempre apresia Northern Territory, tanba timoroan barak buka moris no servisu iha-ne’ebá,” nia dehan.
Assanami mós hateten Timor-Leste sei propoin atu forma ekipa interministeriál hamutuk ho departamentu relevante sira, atubele servisu hamutuk hodi implementa no realiza kompromisu sira ne’ebé estabelese ona.
Nune’e mós, Ministra Xefe Territóriu Norte Austrália, Lia Finocchiaro, hatutan vizita ne’e atu reafirma kompromisu Northern Territory ba akordu parseria estratéjika ho Timor-Leste.
Objetivu husi enkontru ne’e mak atu asegura iha futuru katak Timor-Leste no Northern Territory bele servisu hamutuk atu hasa’e kapasidade, dezenvolve traballadór ho kualifikasaun, promove mobilidade traballadór no dezenvolve parseria sira seluk ne’ebé bele fó benefísiu ba parte rua.
“Ami konkorda kona-ba dezenvolvimentu kapasidade, formasaun rekursu umanu no hasa’e kualifikasaun ema sira. Ami komprometidu atu haree implementasaun dezenvolvimentu no desentralizasaun iha ministériu no Estadu. Ita iha prioridade sira, no ami komprometidu atu mobiliza juventude atu kontribui liuhosi servisu sira,” nia dehan.
Lia subliña relasaun entre Timor-Leste no Northern Territory importante tebes, la’ós de’it tanba proximidade jeográfika, maibé mós tanba iha ligasaun família no komunidade entre povu Timor-Leste no Northern Territory.
“Tanba ne’e, ita presiza kontinua komunikasaun no hametin relasaun. Ami sempre apresia Northern Territory no nia apoiu ba Timor-Leste. Timor-Leste no Austrália iha relasaun ne’ebé naruk. Ami hakarak kontinua hametin relasaun ida-ne’e no servisu hamutuk ba futuru,” nia tenik.
Jornalista: Osória Marques
Editór : Xisto Freitas da Piedade
