Xefe Governu Territóriu Norte Austrália nian vizita Timor-Leste
DILI, 08 Setembru 2026 (TATOLI) – Xefe Governu Teeritóriu Norte Austrália nian, Lia Finocchiaro, ohin halo viajen ba Timor-Leste ba ninia vizita ofisiál dahuluk nu’udar Xefe Governu hodi foka ba prestasaun rezultadu prátiku sira iha ámbitu Akordu Parseria Estratéjiku Territóriu Norte–Timor-Leste 2023–2027.
Nota imprensa ne’ebé TATOLI asesa husi Governu Territóriu Norte, katak vizita ne’e sei iha foku partikulár ba dezenvolvimentu forsa traballu, abilidade no formasaun, edukasaun, oportunidade ekonómika no ligasaun ne’ebé metin liu entre jurizdisaun rua ne’e.
Iha vizita ne’e, Xefe Governu sei hasoru malu ho Primeiru Ministru Xanana Gusmao no Prezidente Repúblika Jose Manuel Ramos-Horta.
Xefe Governu hatete katak Timor-Leste hanesan parseiru rejionál ida ne’ebé importante ba territóriu, ho ligasaun istórika, komunitária, kulturál no institusionál ne’ebé forte entre povu Timor-Leste no Territóriu.
“Timor-Leste la’ós de’it ita-nia viziñu – ne’e hanesan belun no parseiru kleur ona ba Territóriu ne’e,” Xefe Governu hateten.
“Ami-nia relasaun harii iha ligasaun kle’an entre ami-nia ema, instituisaun no komunidade sira, no Akordu Parseria Estratéjiku fó ba ami-nia enkuadramentu ida ne’ebé forte atu lori relasaun ne’e ba oin.”
SPA fornese enkuadramentu ida ba kooperasaun no interkámbiu iha edukasaun, negósiu no forsa traballu, komérsiu no investimentu, turizmu, preparasaun ba emerjénsia, agrikultura, saúde, desportu, arte no kultura.
Governu CLP Finocchiaro nian foka atu transforma enkuadramentu ne’e ba parseria prátika sira ne’ebé fó benefísiu ba ema sira iha jurizdisaun rua ne’e, inklui hametin kooperasaun kona-ba abilidade sira no dezenvolvimentu forsa traballu nian.
“Territóriu tama iha períodu ida kreximentu ekonómiku signifikativu nian, ho oportunidade boot sira iha rekursu, enerjia, konstrusaun, infraestrutura, defeza, turizmu, saúde no setór sira seluk ne’ebé aumenta ezijénsia ba traballadór kualifikadu sira,” Xefe Governu hateten.
“Iha tempu hanesan, Timor-Leste mós investe hela hodi dezenvolve abilidade no kapasidade ninia forsa traballu nian.”
TATOLI
