Xina disponibiliza rihun $15 ba ACT atu hasa’e produsaun kafé Timór
DILI, 08 Setembru 2026 (TATOLI) – Embaixada Xina iha Timor-Leste fó doasaun yuan 100.000, ekivale ho rihun $15 ba Asosiasaun Kafé Timor (ACT, sigla portugés) hodi apoia produtór kafé no ajuda hadi’a kondisaun produsaun kafé iha rai-laran.
Serimónia doasaun ne’e hala’o iha Fatuhada, Dili, no hetan partisipasaun husi Konselleiru Ekonómiku no Komersiál iha Embaixada Xina iha Timor-Leste, Zhao Suocheng, Diretór-Jerál Indústria iha Ministériu Komérsiu no Indústria, Jorge Ferreira, Prezidente ACT, Daniel Leong, no reprezentante sira husi setór kafé no empreza xineza sira.
Zhao Suocheng esplika katak apoiu diretamente ba produtór kafé sira ne’e atu sosa ferramenta produsaun báziku sira no seluk tan.
“Apoiu ne’e hakarak atu hadi’a kondisaun produsaun agrikultór sira-nian no, konsekuentemente, hasa’e kualidade kafé timoroan nian”, nia hatete.
Zhao Suocheng realsa katak Xina kontinua apoia dezenvolvimentu indústria kafé iha Timor-Leste, tanba nota katak kafé hanesan ai-horis agríkola ne’ebé vitál no nu’udar esportasaun prinsipál país nian.
“Hanesan indústria ida ho númeru partisipante barak no alkanse luan, hala’o papél importante ida hodi aumenta rendimentu uma-kain nian, diversifikasaun ekonómika, no dezenvolvimentu sustentavel”, nia dehan.
Iha kontestu ida-ne’e, Konselleiru Ekonómiku no Komersiál, Zhao Suocheng, subliña katak Governu Xina, fó importánsia boot ba kooperasaun ho Timor-Leste iha setór kafé, hodi buka atu hametin kolaborasaun iha kadeia valór tomak, no mós iha formasaun rekursu umanu, transferénsia no promosaun teknolojia, troka tékniku, promosaun produtu, no dezenvolvimentu merkadu.
Aleinde formasaun kona-ba téknika kultivu, kooperasaun ne’e inklui mós formasaun kona-ba prosesamentu kafé, doasaun ekipamentu, no troka esperiénsia entre parte interesada sira husi nasaun rua ne’e.
Nia afirma katak Xina sei kontinua apoia ACT nia partisipasaun iha Expo Internasionál Importasaun Xina no Expo Xina-ASEAN iha tinan ne’e, inklui liuhusi fornese espasu espozisaun no promove kafé timoroan entre konsumidór xinés sira.
Foku ba promosaun kafé timoroan nian iha mós ligasaun ho potensiál husi merkadu xinés, ne’ebé, tuir Zhao Suocheng, iha kreximentu lalais iha tinan hirak ikus ne’e.
Konselleiru ne’e nota katak Timor-Leste nia kafé orgániku no ninia kualidade, sabór, no reputasaun internasionál, hatudu promesa boot hodi hetan ain-fatin ne’ebé forte liu iha merkadu xinés, no nia reafirma kompromisu atu kontinua serbisu hamutuk ho instituisaun timoroan sira no ACT hodi hametin kooperasaun iha setór ne’e.
“Ami sei kontinua hametin kooperasaun ho Ministériu Komérsiu no Industria, Ministériu Agrikultura, Pekuária, Peska no Floresta, no ACT, hadia mekanizmu komunikasaun no koordenasaun, no hala’o formasaun kona-ba kultivu no prosesamentu kafe”, nia salienta.
Zhao Suocheng hatutan katak Xina kontinua apoia Timor-Leste nia esforsu atu dezenvolve indústria kafé, hadi’a agrikultór sira-nia moris, no habelar asesu ba kafé Timór nian ba merkadu xinés.
Prezidente ACT, Daniel Leong, hato’o agradesimentu ba apoiu kontínua husi Embaixada Xina, no subliña importánsia husi kooperasaun hodi liga produtór timoroan sira ba merkadu Xina.
“Ho relasaun no apoiu ne’ebé forte husi Embaixada Xina, ami ajuda hela parte interesada sira hotu, hahú husi agrikultór sira iha Timor-Leste to’o konsumidór sira no merkadu iha Xina”, nia afirma.
Daniel Leong akrexenta katak asosiasaun ne’e komprometidu atu serbisu hamutuk ho produtór sira hodi hasa’e kualidade no produsaun kafé Timór nian, nune’e bele kapitaliza oportunidade iha merkadu Xina.
Jornalista: Arminda Fonseca
Editora: Maria Auxiliadora
