AIFAESA loke liras iha Baukau
BAUKAU, 09 Setembru 2026 (TATOLI)—Autoridade Inspesaun no Fiskalizasaun Atividade Ekonómika, Sanitária no Alimentár, Institutu Públiku (AIFAESA, I.P.), loke liras iha Munisípiu Baukau hodi kontrola kualidade produtu iha zona leste.
Inspetora Jerál AIFAESA, Odete da Silva Viegas, esplika desizaun estabelese edifísiu Munisípiu Baukau atu hala’o atividade inspesaun no fiskalizasaun ba rejiaun leste iha-ne’ebé durante eziste AIFAESA foin destaka iha munisípiu tanba durante ne’e hasoru limitasaun hanesan rekursu umanu, ekipamentu servisu no infraestrutura.
Notísia relevante: OJE 2026: AIFAESA ezekuta ona 50%
“Ita hahú destaka ona ita-nia funsionáriu AIFAESA mai iha Baukau. Ekipa ida-ne’e sei hala’o nia kna’ar haree ba rejiaun leste ne’ebé hanesan Vikeke, Lautein no Baukau,” Odete da Silva Viegas hateten iha Salaun Soimali Administrasaun Baukau, Vila Nova, Kuarta ne’e.
Odete Viegas relata faze dahuluk destaka funsionáriu hamutuk na’in-sia hodi hala’o serbisu iha zona leste nu’udár pasu importante atu aprosima servisu AIFAESA ba komunidade no atividade negósiu sira iha rejiaun leste.
Funsionáriu na’in-sia kompostu husi tékniku no inspetór na’in-lima, asistente na’in-tolu no motorista na’in-ida hodi suporta servisu AIFAESA iha área operasionál, petrolizasaun no laboratóriu, ne’ebé sei liga ho atividade turizmu, komérsiu no indústria.
Odete konsidera ekipa ne’ebé destaka permanente iha Baukau sei halo atendimentu no resposta ba keixa komunidade ho lalais tanba durante tinan barak ekipa husi Dili presiza halo dezlokasaun ba munisípiu sira iha rejiaun leste bainhira iha keixa husi komunidade.
Nune’e, AIFAESA sei hetan apoiu husi Ekipa Jestaun Merkadu Munisípal no Serbisu Munisipál Alimentasaun atu hametin kontrolu no fiskalizasaun ba atividade negósiu, komérsiu no serbisu alimentasaun iha munisípiu.
Jornalista: Natalino Belo
Editór: Xisto Freitas da Piedade
