Cedelízia husu Governu hadi’a prosesu burokrasia atu evita abandonu projetu
DILI, 09 Setembru 2026 (TATOLI)-Prezidente Komisaun C ne’ebé trata Asuntu Finansa Públika, Cedelízia Faria dos Santos, husu ba ministériu no entidade kompetente sira atu hadi’a prosesu burokrasia iha sistema, hodi evita empreza sira abandona projetu infraestrutura tanba hasoru difikuldade iha implementasaun projetu sira.
Tuir nia, prosesu administrativu husi aprovasaun projetu to’o pagamentu dalabarak nesesita tempu, no situasaun ne’e bele fó impaktu ba empreza sira ne’ebé implementa projetu.
Deputada ne’e salienta katak, bazeia ba fiskalizasaun iha baze, Komisaun haree katak iha projetu balun ne’ebé empreza implementa ona ho utiliza osan rasik.
Nia hatete katak, emprezáriu timoroan balun laiha kapitál sufisiente, nune’e bainhira hetan kontratu, sira presiza husu kréditu ba iha banku atu hahú no kontinua obra.
“Atu simu de’it kréditu, prosesu kle’ur. Bainhira osan kréditu sai halo ona serbisu, nia atu hatama fali pedidu pagamentu ba Governu mós prosesu kle’ur. Entaun, bainhira hala’o hela serbisu ho osan kréditu, osan ne’ebé Governu seidauk transfere fali ba nia difikulta ona nia atu kontinua fila-fali serbisu”, nia hatete.
Tuir nia, kestaun ne’e la’ós mai de’it husi parte kompañia sira, maibé envolve mós prosesu pagamentu no mekanizmu administrativu iha instituisaun públika. “Ema balun halo serbisu to’o ona 50%, seidauk hetan pagamentu, ida-ne’e mós fó impaktu ba projetu ne’ebé agora abandonadu”, nia dehan.
Komisaun C sei bolu ministériu no instituisaun públika kompetente sira, depoizde resesu, atu diskute no buka solusaun ba kestaun ne’e.
Cedelízia Faria realsa katak, atu hasa’e partisipasaun no kapasidade setór privadu timoroan, presiza hadi’a prosesu administrativu no redús prosesu ne’ebé naruk, hodi fasilita empreza sira atu implementa projetu ho kualidade di’ak.
Lembra katak, Ajénsia Dezenvolvimentu Nasionál (ADN), iha tinan 2026, identifika projetu abandonadu hamutuk 56 iha territóriu. Razaun ne’ebé kontribui ba abandona projetu sira ne’e inklui problema kapasidade finanseira no jestaun internál iha setór privadu.
Notísia relevante: http://Tinan 2026, ADN rejista projetu abandonadu iha territóriu hamutuk 56 –
Jornalista: Nelson de Sousa
Editora: Maria Auxiliadora
