HAK husu HNGV atu halo tratamentu dignu ba inan sira foin partu
DILI, 09 Setembru 2026 (TATOLI)—Asosiasaun HAK husu Hopsitál Nasionál Guido Valadares atu halo tratamentu dignu ba inan sira-ne’ebé mak foin partu.
“Husu ba HNGV atu halo tratamentu dignu ba inan sira-ne’ebé mak foin partu, tanba sira-ne’e presiza fatin di’ak atu sira deskansa hodi fó susu ba sira-nia bebé. Agora, problema ne’ebé mak daudaun inan sira hasoru iha HNGV ne’e problema jestór sira, tanba sira la iha kapasidade atu halo jestaun no planu oinsá prepara fatin iha tempu ne’ebé mak pasiente ba barak liu. HNGV nakonu hela de’it, sira tenke buka alternativa seluk,” Vise Diretór HAK, Antonino Limas, hateten ba jornalista sira iha HNGV, Bidau, ohin.
Nia dehan, kama ne’ebé mak HNGV oferese ne’e la sufisiente, entaun oinsá buka alternativa seluk atu rezolve lalais hodi responde ba númeru paisente barak ne’ebé mak iha HNGV.
“Se ita dehan bele hanoin banhira akontese ba, depois rezolve lalais parte ida dehan jestór sira halo sira-nia kna’ar. Maibé, situasaun kama menus kontinua akontese beibeik ne’e signifika públiku tenke kestiona ba Governu katak jestór sira iha HNGV, sira kna’ar direita ho asuntu ida-ne’e atu rezolve lalais. Tanba, banhira inan sira partu ne’e presiza rekuprasaun ne’ebé mak di’ak,” nia hateten.
Pasiente toba iha li’ur
Antes ne;e, Pasiente Felecidade da Cruz informa, nia mai baixa iha ospitál loron lima ona, tanba nia foin partu horisehik maibé fatin sira mak laiha.
“Durante loron lima ona ha’u rasik hasoru problema. Ida-ne’e la’ós ha’u mesak maibé ema barak hasoru problema hanesan fatin atu toba ne’e mak laiha dunia, hanesan balun toba de’it iha li’ur. Ha’u foin partuhorisehik, maibé fatin kama ba inan sira laiha, entaun toba de’it iha li’ur, nahe de’it kaixa hodi toba, depois hodi haree oan,” Felecidade da Cruz hateten.
Nia dehan, labarik toba iha laran inan toba iha li’ur, kama ba inan sira partu ne’e atu toba mak laiha dunia. Nu’udar inan ne’ebe foin partu, sente triste tebes bainhira rai malirin.
“Se situasaun hanesan ne’e afeta fali moras balun hanesan raan mutin sa’e, tanba foin partu loron ida toba kedas iha rai. Tanba ne’e, ha’u rekomenda ba na’i ulun sira liuliu ba Governu, atu tau matan ba fatin iha maternidade ne’ebé inan sira atu partu ne’e. Bainhira inan sira partu fatin kama ne’e tenke iha, atu nune’e bainhira partu karik sira bele toba hodi kuidadu bebé ho di’ak,” nia dehan.
Ho nune’e, nia hateten, bebé ho nia inan kondisaun bele di’ak nafatin no bainhira bebé ho inan kondisaun ladi’ak ne’e sei afeta saúde. Agora, oan toba iha kama, inan toba iha rai ne’e fó perigu tebes ba inan nia saúde bainhira atu fó susu ba bebé.
“Atendimentu husi parteira sira-nian ba pasiente sira iha laran ne’e di’ak, maibé difikuldade uitoan mak fatin toba mak laiha. Tanba kama ne’ebé sira prepara ne’e, inan isin-rua be partu ne’e toba nakonu hotu. Agora sei iha hela no triste hela tanba seidauk alta, depois sei toba tan iha rai, agora sei nafatin toba iha rai. Ida-ne’e mak sai preokupasaun boot ida ba pasiente sira,” nia esplika.
Jornalista : Felicidade Ximenes
Editór : Cancio Ximenes
