IGEADI seidauk normaliza estrada ligasaun Saburai-Lolotoe
BOBONARU, 09 Setembru 2026 (TATOLI) – Institutu Jestaun Ekipamentu no Apoiu Dezenvolvimentu Infraestrura, Institutu Públiku (IGEADI) Brigada Maria Tapó seidauk halo normalizasaun ba estrada ligasaun husi suku Saburai, postu administrativu Maliana, bá suku Gildapil no Lebos, postu Lolotoe, munisípiu Bobonaru, ne’ebé hetan danus kauza husi rai-halai hafoin akontese udan-boot iha Marsu liubá.
Xefe Suku Saburai, Abel Manu Mali, dehan proposta eskrita no verbal hato’o ona ba Prezidente IGEADI iha fulan-Maiu ne’e, maibé to’o agora seidauk hetan resposta.
“Ami na’in-rua kontaktu malu dala-rua ona. Nia dehan 20 Maiu ne’e hotu, ekipa mobiliza mákina, más to’o agora mós la tun. Sira preokupa ho mina laiha, ha’u lahatene tanba saida”, nia dehan ba Tatoli, iha Maliana, ohin.
Abel Mali akrexenta katak kondisaun estrada daudaun ne’e difikulta tebes movimentasaun transporte roda haat.
“Dalan aat loos. Udan tun mai agora ema liu la di’ak kedas, karreta bá-mai ne’e sempre dada de’it mak liu. Durante ne’e karreta tolu mak baku fila ona iha ne’ebá, tanba sa’e labele mak tun fali”, nia relata.
Komunidade Lolotoe, Nelson Belo, husu ba IGEADI atu konsidera sira-nia preokupasaun ne’e, tanba estrada importante ba asesu atividade ekonómika, saúde no seluk tan.
“Se bailoro hanesan ne’e mak la mai hadi’a, udan agora movimentu paradu kedas, tanba kareta sa’e labele. Agora de’it mós atu sa’e ne’e dada-malu mak bele. Ha’u hanoin udan tan, ami atu lori produtu lokál bá merkadu Maliana mós la di’ak, moras karik mós hulan hodi tun bá to’o Saburai mak foin sa’e karreta. Ida-ne’e ami sente triste, tanba dalan ne’e aat fulan neen liu ona mós Governu la tau-matan”, nia lamenta.
Notísia relevante: Normalizasaun estrada Saburai-Lolotoe muda ba trosu foun
Ba kestaun ne’e, jornalista Tatoli tenta atu konfirma ho Koordenadór IGEADI Brigada Maria Tapó, maibé laiha fatin tanba daudaun halo hela serbisu iha Dili.
Estrada ne’e nu’udar alternativa liga suku Gildapil, Lebo no mós munisípiu Kovalima.
Notísia relevante: Rai-halai kauza danu ba estrada ligasaun Saburai-Lolotoe
Jornalista: Sergio da Cruz
Editora: Maria Auxiliadora
