PNTL Kovalima deporta sidadaun Indonézia na’in-12
KOVALIMA, 09 Setembru 2026 (TATOLI) – Polísia Nasionál Timor-Leste (PNTL) Munisípiu Kovalima, deporta sidadaun Indonézia na’in-12 ba sira-nia rain Indonézia, tanba sira uza pasaporte turista ne’ebé fotokópia no prazu validade ramata ona hodi hala’o atividade negósiu iha Munisípiu Kovalima .
Segundu Komandante PNTL Munisípiu Kovalima, Superintendente Asistente, Patrício de Jesus, hateten katak sidadaun Indonézia na’in-12 ne’e PNTL deteta no priende iha loron 04 Agostu 2026 hodi halo prosesu identifikasaun no investigasaun.
“Sidadaun ne’ebé mak deporta fila maioria mai husi Indonézia, tanba sira uza viza turista, maibé bainhira ita-nia servisu intelijénsia deteta katak sira halo atividade negósiu, PNTL halo kaptura no lori ba Komandu atu halo prosesu tuir lei,” Patrício de Jesus hato’o ba jornalista sira iha Komandu PNTL Kovalima, Santa Rosa, ohin
Autoridade polisiál ne’e esplika katak, bazeia ba rezultadu investigasaun, sidadaun na’in-12 ne’e uza pasaporte fotokópia, la uza pasaporte orijinál, no dokumentu balun mós prazu validade ramata ona.
“Bainhira sidadaun halo viajen, tenke uza pasaporte orijinál no válidu, la’ós uza fotokópia pasaporte ne’ebé validade remata ona,” nia afirma.
Kumpre regra no prosedimentu imigrasaun
PNTL Kovalima, hafoin halo prosesu identifikasaun, halo koordenasaun ho autoridade imigrasaun atu asegura prosesu deportasaun ba Indonézia.
Patrício de Jesus mós hateten katak sidadaun na’in-12 ne’e deteta iha área oioin iha territóriu Munisípiu Kovalima, to’o iha nível suku no aldeia.
Nia apela ba sidadaun estranjeiru sira atu kumpre regra no prosedimentu imigrasaun, inklui uza dokumentu viagem orijinál no válidu bainhira tama no hala’o atividade iha Timor-Leste.
Jornalista: Celestina Teles
Editór: Rafael Ximenes de A. Belo
