Programa PNDS Suku Dilór prioriza konstrusaun morru protesaun ba mota Aribais
VIKEKE, 09 Setembru 2026 (TATOLI)—Xefe Suku Dilór, Postu Administrativu Lakluta, Munisípiu Vikeke, Jacinto Ximenes, informa Programa Nasionál Dezenvolvimentu Suku (PNDS) ba tinan 2026 prioriza konstrusaun morru protesaun ba mota Aribais, lokaliza iha Aldeia Aidák, Suku Dilór.
“Programa PNDS ba tinan ida-ne’e ami prioriza morru protesaun ba mota Aribais tanba iha tempu udan mota tun, rai sempre erosaun ka rai halai hodi afeta ba komunidade uma-kain ualu (8) iha Aldeia Aidák. Planu ne’e ami tau iha tinan 2025, implementasaun mak tinan 2026,” Jacinto Ximenes ba TATOLI, iha Postu Lakluta, Kuarta ne’e.
Autoridade lokál ne’e relata konstrusaun morru protesaun objetivu atu proteje komunidade iha tempu udan labele afeta ba dezastre naturál. Tan ne’e, Konsellu Suku Dilór tau planu iha programa PNDS konstrui morru protesaun.
“Kona-ba distánsia morru protesaun ho totál kilómetru 25, naruk metru hitu (7m). Husi morru ne’e ita bele salva ita-nia komunidade nia hela fatin, atu mosu dezastre karik labele alastra tan komunidade seluk nian uma iha Suku Dilór,” nia tenik.
Nia esplika konstrusaun morru protesaun gasta orsamentu hamutuk $19.000,00, hodi sosa materiál no selu badaen lokál sira.
“Progresu konstrusaun morru protesaun ne’e daudaun ne’e atinje ona 90%. Ami hein hela fornesedór hatama tan rede gabiaun (bronjong) ne’e lima ka sanulu hanesan ne’e ami konklui ona obra PNDS ba tinan 2026. Ha’u sente obra ne’e iha fulan-Setembru bele konkluidu,” nia akresenta.
Jornalista: Vitorino Lopes da Costa
Editór: Xisto Freitas da Piedade
