Ramos-Horta kondekora Diretór Peace Corps
DILI, 09 Setembru 2026 (TATOLI)–Diretór Peace Corps Timor-Leste, James Fouss, agradese ba Prezidente Repúblika, José Ramos-Horta, ne’ebé fó kondekorasaun medalla Timor-Leste ba nia durante enkontru ida iha Palásiu Prezidensiál, kuarta ne’e.
“Ha’u hakarak hato’o ha’u-nia agradeseimentu boot ba Prezidente Ramos-Horta tanba kondekora ona ha’u ho medalla ida-ne’e. Nia sai ona apoiadór boot ba programa Peace Corps, liu-liu desde 2002, bainhira nia konvida voluntáriu sira mai ajuda dezenvolvimentu nasaun,” James hateten ba jornalista sira iha Palásiu Prezidensiál Nicolau Lobato, Bairru Pite.
Diretór ne’e informa, iha enkontru ne’e sira ko’alia mós kona-ba planu prezidente nian atu ba partisipa iha Asembleia Jerál Nasaun Unida iha Nova Iorke durante loron lima no mós vizita ba Washington, D.C.
Nia mós konvida Prezidente atu vizita eskritóriu Peace Corps iha Washington, D.C. hodi ko’alia kona-ba oinsá atu aumenta tan voluntáriu sira mai servisu iha Timor-Leste.
“Ha’u ko’alia ho nia kona-ba ha’u-nia planu atu vizita eskritóriu Peace Corps no hasoru ekipa iha ami-nia sede, atu ko’alia kona-ba esperiénsia servisu hanesan voluntáriu Peace Corps iha Timor-Leste,” nia esplika.
Kona-ba pedidu Prezidente nian atu Peace Corps la’ós de’it hanorin lian Inglés maibé mós fahe koñesimentu tékniku, James Fouss hateten Peace Corps agora daudaun iha projetu rua prinsipál.
Projetu dahuluk mak Projetu Formasaun ba Profesór Inglés. Iha projetu ne’e, voluntáriu sira servisu hamutuk ho profesór Timoroan sira atu hadi’a sira-nia kapasidade hanorin.
Projetu daruak maka Projetu Dezenvolvimentu Ekonomia Komunitária. Projetu ne’e foka ba joven sira liuhusi hanorin oinsá hakerek CV, prepara ba entrevista servisu no mós uza komputadór no literasia dijitál.
“Iha projetu ne’e, aleinde hanorin abilidade sira-ne’ebé ajuda joven sira prepara-an ba servisu, voluntáriu sira mós hanorin kona-ba uza komputadór no literasia dijitál,” nia afirma.
Ba voluntáriu sira ne’ebé agora servisu iha komunidade, nia dehan, voluntáriu hotu-hotu agora daudaun iha ona sira-nia fatin no foin hahú sira-nia serbisu.
“Ha’u sente kontente tebes tanba simu medalla ida-ne’e. Ha’u hela no servisu iha Timor-Leste durante tinan lima, tanba ne’e, simu medalla ida-ne’e diretamente husi Prezidente mak onra boot ida mai ha’u,” nia konklui.
Jornalista : Hortêncio Sanchez
Editór : Cancio Ximenes
