Ramos-Horta simu delegasaun Parlamentár Japaun hodi aborda kooperasaun bilaterál
DILI, 09 Setembru 2026 (TATOLI) – Prezidente Repúblika, José Ramos-Horta, simu vizita delegasaun Parlamentár Japaun nian hodi diskute kona-ba hametin kooperasaun bilaterál.
Deputadu japonés, Endo Takashi, informa katak iha sorumutu ne’e diskute kona-ba kooperasaun iha área infraestrutura, ekonomia, investimentu, no dezenvolvimentu rekursu umanu ne’ebé Japaun apoia ba Prezidénsia ASEAN Timor-Leste nian iha 2029 no kooperasaun hodi kombate fraude online.
“Ami ko’alia liuliu kona-ba infraestrutura, ekonomia, investimentu, no apoiu rekursu umanu”, Endo Takashi reitera ba jornalista sira.
Deputadu ne’e afirma katak Japaun iha intensaun atu kontinua tulun Timor-Leste iha nia prosesu dezenvolvimentu no integrasaun rejionál, partikularmente kona-ba Timor-Leste nia futuru ba Prezidénsia ASEAN nian.
“Timor-Leste sai hanesan membru ASEAN nian no sei asume Prezidénsia ASEAN nian iha tinan 2029. Japaun mós hakarak fó apoiu nafatin ba Timor-Leste”, nia hatete.
Tópiku seluk ne’ebé diskute mak luta hasoru fraude online, fenómenu ida ho ámbitu internasionál ne’ebé mós afeta Japaun, iha ne’ebé idozu sira maka entre vítima prinsipál sira.
Tuir Endo Takashi, delegasaun ne’e hato’o preokupasaun relasiona ho situasaun ida-ne’e iha Timor-Leste no hato’o Japaun nia vontade atu koopera ho nasaun ne’e hodi hametin esforsu ba prevensaun no kombate tipu krime ida-ne’e. Hodi destaka importánsia husi kooperasaun internasionál hodi rezolve dezafiu ida-ne’e.
Delegasaun parlamentár japoneza mós diskute perspetiva investimentu ba empreza japoneza sira iha Timor-Leste, espesifikamente destaka inisiativa Tsuneishi Shipbuilding nian iha setór konstrusaun ró nian iha Manatutu.
Endo Takashi afirma katak deputadu sira husu ona apoiu nesesáriu husi autoridade timoroan sira hodi fasilita progresu projetu nian. Deputadu ne’e destaka mós planu sira Itochu nian hodi investe iha setór enerjia solár iha Manatutu, hodi nota katak inisiativa sira-ne’e bele kria empregu foun sira no impulsiona dezenvolvimentu ekonómiku lokál.
Delegasaun hatudu interese atu kontinua hametin kontaktu no kooperasaun entre Timor-Leste no Japaun liuhusi kanál diplomátiku no institusionál ne’ebé iha ona.
Endo Takashi mós husu atu kontinua esforsu konjuntu hodi aprofunda relasaun amizade entre nasaun rua ne’e.
Jornalista: Arminda Fonseca
Editora: Maria Auxiliadora
