SEATOU: Governu sei foti medida hasoru negosiante ne’ebé soe fo’er arbiru

DÍLI, 08 Setembru 2026 (TATOLI) – Sekretáriu Estadu Asuntus Toponímia no Organizasaun Urbana (SEATOU) alerta ba negosiante sira ne’ebé hala’o atividade negosiu dalan ninin iha tempu kalan atu labele soe foer arbiru iha fatin públiku, liuliu iha baleta no estrada ninin.

“Negosiante sira tenke mantein igiene hodi proteje saúde públika. Bainhira la kumpri regra limpeza no kontinua soe lixu arbiru, Governu sei la tolera no bele foti medida hasoru sira ne’ebé uza fatin públiku hodi fa’an sasan,” dehan Sekretáriu Estadu Asuntu Toponímia no Organizasaun Urbana, Germano Santa Brites Dias.

Nia dehan negosiante sira ne’ebé fa’an hahán, ikan, modo no sasán seluk iha fatin públiku tenke toma responsabilidade atu limpeza área ne’ebé sira uza durante atividade komérsiu.

Germano hateten katak rezultadu monitorizasaun SEATOU iha área balun iha Dili, inklui Fatuhada, Delta Komoro, Santa Cruz no fatin seluk, hatudu katak sei iha negosiante balun ne’ebé soe fo’er iha baleta no dalan ninin hafoin atividade negosiu.

“Tanba ne’e, ami husu ba negosiante hotu atu hamos fo’er no soe lixu ba fatin ne’ebé apropriadu molok fila ba uma, hodi asegura igiene no proteje saúde públika,” dehan Germano.

Tuir nia, limpeza no ordenamentu urbana la’ós de’it responsabilidade Governu nian, maibé presiza mós partisipasaun ativa husi sidadaun no negosiante sira atu asegura Dili nu’udar kapital ida ne’ebé moos, organizadu no saudável.

Nia akresenta katak SEATOU sei kontinua halo kampaña sensibilizasaun no kontrolu maka’as ba área komérsiu sira atu asegura negosiante sira kumpri regra limpeza.

SEATOU espera katak liuhusi kooperasaun entre Governu, negosiante no komunidade bele asegura limpeza iha fatin públiku hodi kontribui ba Dili ida furak no moos.

Jornalista: Camilio de Sousa
Editór: Filomeno Martins