Agrikultura Lakluta kuda kafé variedade robusta hun 200
VIKEKE, 10 Setembru 2026 (TATOLI)—Koordenadór Grupu Kaiuai, Suku Dilór, Postu Lakluta, Munisípiu Vikeke, Nazário Soares de Carvalho, informa Sentru Agrikultura husi Grupu Kaiuai daudauk ne’e kontinua kuda kafé ho variedade robusta hun 200-resin.
“Ami hahú kuda kafé variedade robusta ne’e iha tinan 2016. Ami kuda no kuidadu hanesan hamoos duut. Ami kuda ho kuantidade ne’ebé sei ki’ik (hun 200-resin) mak kuda iha ami-nia sentru. Nune’e, iha tinan 2022 to’o agora fuan ona, maibé fuan la barak. Kolleta primeiru ami hetan saku kilógrama 20. Dalaruma saku sanulu to’o 15 de’it,” Nazário Soares ba TATOLI, iha Postu Vikeke Vila, Kinta ne’e.
Koordenadór Grupu Kaiuai ne’e hatutan grupu kontinua tau-matan ba kafé sira-ne’ebé kuda ona, tanba kafé ne’e bele tulun membru grupu sira sustenta nesesidade.
“Kafé kada tinan ami sempre kolleta. Depoiz kolleta hotu hamoos ba fa’an. Dalaruma ema mai sosa direta iha ami-nia sentru, kada saku ami fa’an ba $20. Dalaruma folin tun ba $19. Husi osan sira-ne’e ami fa’an hotu fahe ba malu. Balun ami rai iha grupu hodi halo manutesaun ba toos, sosa materiál sira ehanesan ai-suak, enxada no seluk tan,” nia subliña.
Nazário informa bá-oin grupu Kaiuai kontinua fó prioridade ba kafé robusta tanba kafé robusta orijen Timor nian nune’e presiza kontinua kuda no promove, atu kafé robusta nafatin eziste.
Kona-ba dezafiu, nia tenik, dezafiu ne’ebé grupu enfrenta mak laiha ekipamentu loke kafé kulit no bee mak menus hodi rega ba kafé, maibé grupu nafatin iha kompromisu hakarak habarak kafé iha Suku Dilór.
Entrentatu, Grupu Kaiuai totál membru hamutuk na’in-18 mak daudaun ne’e tau-matan ba kafé no hala’o atividade sira sekuk hanesan kuda modo.
Jornalista: Vitorino Lopes da Costa
Editór: Xisto Freitas da Piedade
