Governu sei lansa fatuk dahuluk projetu reabilitasaun estrada Humboe-Ermera Vila
DILI, 10 Setembru 2026 (TATOLI)—Prezidente Autoridade Munisípiu Ermera, José Martinho dos Santos Soares, hateten iha sábadu (12/09) aban ne’e Governu liuhusi Ministériu Obra Públika (MOP) sei halo lansamentu fatuk dahuluk ba projetu reabilitasaun estrada
rurál husi Humboe ba Ermera Vila, ne’ebé lokaliza iha Suku Mertutu, Poetete, Postu Administrativu Ermera, Munisípiu Ermera.
Prezidente Autoridade Munisípiu Ermera, José Martinho dos Santos Soares, hateten iha Sábadu (12 Setembru 2026) agora sei iha lansamentu ba estrada Humboe ba Ermera Vila.
“Ekipa sira iha terrenu preparadu ona no atividade sei hala’o iha Ermera Vila besik kruzamentu ba diresaun Hatulia nian, tanba besik kedas fatin akampamentu kompañia Sali-Magu nian,” PAM Ermera ne’e relata ba Agência Tatoli liuhusi telefónika, ohin.
Nia hatutan, enkuantu kona-ba prezensa husi Primeoru-Ministru, Kay Rala Xanana Gusmão, ne’ebé sei lansa ofisiál ba projetu ne’e maibé nia seidauk hatene, tanba konvite hotu organiza husi MOP.
“Ha’u seidauk hatene maibé dalaruma lansa ofisiál husi Primeiru-Ministru, tanba iha konvite mensiona Xefe Governu nia naran,” nia hateten.
Tanba ne’e, nia dehan, ho projetu ida-ne’e nia garante katak komunidade sei apoiu servisu kompañia nian iha terrenu no sira komprometidu sei la impede prosesu dezenvolvimentu iha sira-nia munisípiu.
“Tanba ami halo sensibilizasaun ba komunidade antes tiha ona, no komunidade laiha problema. Antes ne’e mós kompañia normaliza ona dalan ka loke espasu hodi fasilita movimentu transporte. Bainhira servisu ne’e la’o iha intervensaun ruma husi komunidade, ne’ebé buat hotu sei la’o ho di’ak,” nia dehan.
Projetu reabilitasaun estrada sei implementa husi kompañia Sali-Magu, Unipesoál, Lda, kuaze kilómetru 15 ho orsamentu hamutuk $3.348.725,37 ho durasaun konstrusaun durante tinan ida-nia laran.
Jornalista : Alexandra da Costa
Editór : Cancio Ximenes
