Kaebauk hetan ona lisensa BCTL atu sai banku komersiál
DILI, 10 Setemebru 2026 (TATOLI) – Banku Sentrál Timor-Leste (BCTL, sigla portugés) fó ona lisensa ba Kaebauk atu transforma an husi mikrofinansa sai banku komersiál foun iha Timor-Leste.
“Bainrua ita lansa Kódigu Timor Unique QR (TUQR), iha ne’ebá Kaebauk mós sei sai banku komersiál. Uluk Kaebauk hanesan instituisaun mikrofinansa, maibé agora hetan ona lisensa hanesan banku”, Governadór BCTL, Helder Lopes, informa ohin.
Nia dehan katak Kaebauk liuhusi ona prosesu naruk no kumpre ona rekizitu oioin ne’ebé BCTL ezije atu transforma an sai banku komersiál, inklui rekizitu kona-ba kapitál.
Nia esplika rekizitu ne’ebé BCTL fó ba Kaebauk atu sai banku liu 10, inklui tenke importante iha kapitál sufisiente, estrutura no rekursu umanu ne’ebé apropriadu atu hala’o atividade bankária, sistema finanseira ne’ebé di’ak, integra ho sistema pagamentu BCTL nian, sistema kontrolu osan tama no sai, no rekizitu seluk tan.
“Foin lalais sira aplika ona ba lisensa nian ho kapitál míminu hamutuk millaun $2 no transfere ona kapitál ne’e ba sira-nia konta. Sira mós kumpre kondisaun sira seluk hanesan dijitalizasaun. Tanba ne’e, ami haree hotu aspetu sira ne’e, ami fo lisensa. Parabéns ba Kaebauk tanba bele sai ona banku”, Helder hato’o.
Nia subliña katak ezisténsia Banku Kaebauk ne’e importante tebes, tanba instituisaun ne’e kliente barak iha territóriu laran, inklui iha Oekusi no Ataúru, no fó atensaun foku ba komunidade iha área rurál.
“Importante liu mak sira serve ema sira iha área rurál, no empreza ki’ik sira. Ida-ne’e mak ami hakarak sira ne’e eziste”, nia dehan.
Tuir dadus, to’o Fevereiru 2026, Kaebauk iha númeru funsionáriu 330, kliente 22.561 no oferese ona kréditu hamutuk millaun $45,8.
Notísia relevante: BCTL aprova lisensa temporária ba Kaebauk atu sai banku
Jornalista: Arminda Fonseca
Editora: Maria Auxiliadora
