Preladu na’in-haat hanorin timoroan sira saida mak fiar no domin loloos
DILI, 10 Setembru 2026 (TATOLI)—Sarani wa’in ba wa’in la’o nadodon iha luron ba fatin destinadu atu partisipa selebarasaun misa solene ba restu mortál preladu na’in-haat iha esplanada Tasi tolu.
Sarani sira-ne’e kompostu husi labarik kiik to’o ema boot ho hatais ne’ebé kór oioin la’o daudaun ona iha loron nia mana ba Tasi tolu, iha balun la’o ain, balun seluk ho transporte públiku no privadu, tanba preladu na’in-haat ne’e mós kontribui hodi dezenvolve Timor-Leste.
To’o iha dalan jornalista Agência Tatoli halo entrevista inan ida ho nia oan na’in-rua hein hela mikrolet iha Fatuhada, Enertina Soares, dehan katak hanesan sarani ita tenke partisipa iha misa ida-ne’e, tanba na’in-lulik sira mós kontribui ba ita-nia rai.
“Nai-lulik la’ós de’it halo misa maibé sira mós hanorin mai ita saida mak fiar no domin lolos hanesan moris sarani katólika ida-nian. Tanba ne’e, ita tenke hasa’e orasaun ba sira atu moris hakmatek iha sira-nia mundu foun,” Reprezentante Sarani Fatuhada, Enertina Soares, hateten ba Agência TATOLI bainhira hein hela transporte públiku atu ba Tasi-Tolu, ohin.
Maske sa’e de’it transporte públiku maibé nia ho esperansa katak sira bele to’o iha fatin seremónia ho di’ak no pontualidade atu partisipa misa ho másimu no ninia oan na’in rua mós entusiazmu tebes hakarak ba Tasi-Tolu.
Nia hatutan, jerasaun foun ladun koñese didi’ak sira maibé sira-nia istória ferik katuas sira sempre konta, entaun ida-ne’e sai hanesan lembransa atu jerasaun foun kontinua buka hatene na’in-lulik sira-ne’ebé luta mós ba ukun-an
“Entaun sira sai hanesan ita-nia éroi, nune’e tenke haloot duni sira-nia restu mortál iha ne’e atu sai nafatin sai eransa líder katóliku no sira-nia fatin bele sai hanesan turizmu ka muzeu relijiozu ba povu Timor atu lembra nafatin sira-nia istória,” nia dehan.
Enkuantu bazeia ba observasaun jornalista nian iha terrenu hatudu katak, komunidade sira-ne’ebé la’o-ain de’it mak ba misa iha Tasi-Tolu, sira hahú mobiliza keda iha tuku 15h00 liu no tuir dalan parte seguransa sempre halo kontrola másimu iha fatin-fatin hodi asegura situasaun.
Jornalista : Alexandra da Costa
Editór : Cancio Ximenes
