SSM Kovalima planea koloka pesoál saúde bá postu foun
KOVALIMA, 10 Setembru 2026 (TATOLI) – Servisu Saúde Munisípiu (SSM) Kovalima planea atu koloka pesoál saúde iha postu saúde foun lima ne’ebé atualmente iha prosesu konstrusaun.
Diretór Servisu Saúde Munisípiu Kovalima, Domingos Sequeira, hateten, kolokasaun pesoál saúde sei hala’o hafoin konstrusaun postu saúde sira remata ho objetivu atu garante atendimentu saúde ba komunidade.
Postu saúde lima ne’ebé konstrui liuhusi projetu Planu Dezenvolvimentu Integradu Munisípiu (PDIM) 2026 ne’e lokaliza iha Postu Administrativu Suai, Suku Suai Loro, Postu Administrativu Zumalai,iha Suku Usecai, Postu Administrativu Fatululik, Suku Taroman,iha Aldeia Holba ,Postu Administrativu Tilomar,iha suku Casabauc no Postu Administrativu Maucatar, Suku Matai.
“Ami hala’o vizita ba konstrusaun postu saúde foun sira. Ami hanesan na’in ba projetu foku atu haree kontratu sira, atu garante konstrusaun la liu prazu ne’ebé define ona iha kontratu. Maibé, kona-ba progresu konstrusaun, PDIM mak hatene,” Domingos Sequeira hateten ba TATOLI iha Camnasa.
Nia hateten katak, hafoin konstrusaun remata, Servisu Saúde sei halo planeamentu kona-ba rekursu umanu bazeia ba planu Ministériu Saúde (MS). Bazeia ba planu MS katak postu saúde ida-idak sei presiza pesoál saúde na’in-lima atu garante atendimentu ba komunidade.
“Se konstrusaun ramata iha 2026, nune’e iha 2027 ami sei halo ona kolokasaun pesoál saúde sira, nune’e postu saúde sira labele hela mamuk ka abandona,” nia hateten.
Maibé, se rekursu finanseiru seidauk sufisiente atu koloka pesoál na’in-lima iha postu saúde ida-idak, servisu saúde sei koloka uluk pesoál na’in rua ka tolu atu hala’o atendimentu ba komunidade, no depois halo pedidu tan ba pesoál adisionál.
Domingos esplika katak, rekursu umanu ba administrasaun públika iha munisípiu mai husi rejime jerál ne’ebé jere husi Ministériu Administrasaun Estatal (MAE), enkuantu pesoál profisionál saúde jere husi Ministériu Saúde.
Bazeia ba Planu Asaun Anual (PAA) 2026, Autoridade Munisípiu Kovalima, liuhusi Servisu Munisípiu PDIM implementa projetu hamutuk 11 ne’ebé foka ba área importante sira hanesan saúde, agrikultura infraestrutura no seluk tan.
Projetu PDIM 2026 iha Kovalima hamutuk 11, ho orsamentu totál US$2,347,081.58, ne’ebé foka ba setór saúde, agrikultura no obra públika.
Jornalista :Celestina Teles
Editór:Florencio Miranda Ximenes
