TL redús taxa pobreza 71.7% presiza dezenvolve setór produtivu
DILI, 10 Setembru 2026 (TATOLI)—Vise-Primeiru-Ministru, Ministru Koordenadór Asuntu Sosiál, Ministru Dezenvolvimentu Rurál no Abitasaun Komunitária, Mariano Assanami Sabino, hateten maneira Timor-Leste atu redús taxa pobreza 71.7% ne’e, presiza dezenvolve setór produtivu sira.
Nia konsidera, pobreza bele fó impaktu ba mánutrisaun (inseguransa alimentár) no métodu ne’ebé ladun justu didi’ak, nune’e nia orienta ona ba ministériu relevante sira atu iha dadu klaru ba populasaun sira-nia rendimentu, kbi’it la’ek hira, mánutrisaun hira, la’ós ema seluk mak mai sukat hela de’it Timor-Leste nia problema.
“Entaun, ita atu simu ka la simu, ita tenke simu de’it tanba ita laiha dadus estatístika ne’ebé klaru,” Vise-Primeiru-Ministru ne’e relata ba jornalista iha Aeroportu, kuarta ne’e.
Nia dehan, dalan ne’ebé atu hamenus pobreza ne’e Governu tenke fasilita formasaun hodi kapasita rekursu umanu atu kria empregu ba sira-nia an, presiza dezenvolve setór produtivu sira liuliu agrikultura, dezenvolvimentu rurál hanesan ekonomia rurál, edukasaun no saúde rurál.
“Joven sira mós presiza asesu ba edukasaun no oportunidade atu investe inklui liuhosi banku ne’ebé bele fó impréstimu ba povu ki’ik. Agrikultór no emprezariál sira-neʼebé iha interese hakarak halo negósiu inovasaun no kriatividade,” nia dehan.
Nia hatutan katak investimentu ba iha infraestrutura bázika, hanesan estrada, eletrisidade no bee-moos mós importante tanba bee bele kontribui ba problema stunting no mánutrisaun kroniku, nune’e Governu sei kontinua halo revizaun ba programa sira no fó prioridade ba problema ne’ebé iha.
PM Xanana la konkorda ho relatóriu Banku Mundiál hatudu lista pobreza 71.7%
Iha sorin seluk, Primeiru-Ministru Kay Rala Xanana Gusmão la konkorda ho relatóriu Banku Mundiál kona-ba TL tama lista pobreza 71.7% no haruka jornalista sira atu husu ba Banku Mundiál karik deteta iha Timor ne’e ema toba iha dalan ninin ho kondisaun hamlaha iha ka lae, se laiha entaun ne’e la’ós pobreza ida.
“Haree fali iha Áfrika ne’ebá, dehan pobreza ita aat liu iha mundu, loos ne’e ha’u foti liman no imi haree ba Google ba haleu mundu haree loos ka lae. Imi haree to’ok iha Amérika rasik ema toba iha lurón, kalan-kalan hamlaha mate,” Xefe Governu ne’e afirma.
Jornalista : Alexandra da Costa
Editór : Cancio Ximenes
