UNFPA lansa programa foun millaun $21.3 ba TL durante tinan lima
DILI, 10 Setembru 2026 (TATOLI)–Diretór Rejionál Interinu UNFPA ba Ázia no Pasífiku, Aleksandar Sasha Bodiroza, kinta ne’e, hasoru malu ho Vise-Primeiru-Ministru, Ministru Koordenadór Asuntu Sosiál no Ministru Dezenvolvimentu Rurál Abitasaun Mariano Assanami Sabino iha Palásiu Governu Dili, hodi ko’alia kona-ba lansamentu programa foun ho montante millaun $21.3 ba tinan lima.
“Ne’e hanesan enkontru kortezia ida ba Vise-Primeiru-Ministru atu ko’alia kona-ba UNFPA nia kna’ar no apoiu hodi avansa prioridade dezenvolvimentu governu Timor-Leste nian,” Aleksandar hateten ba jornalista sira hafoin remata enkontru ho Vise-PM.
Diretór Rejionál ne’e esplika katak programa tinan lima ne’ebé feitu ona foka ba área haat prinsipál mak hanesan saúde inan no planeamentu familiar, prevensaun no resposta ba violénsia bazeia ba jéneru, edukasaun no dezenvolvimentu rural, intelijénsia demográfika no dadus populasaun hodi fó apoiu ba dezenvolvimentu polítika
“Programa ne’e ba tinan lima nia laran. Foku mak iha saúde, edukasaun, prevensaun violénsia, no mós iha dadus populasaun,” nia afirma.
Nia mós hateten katak UNFPA serbisu ona hamutuk ho instituisaun governu nian hanesan DIAG no CAPAS iha implementasaun projetu sira.
Aleksandar subliña katak programa UNFPA nian la’ós mai ho programa rasik, maibé dezenvolve hamutuk ho Governu Timor-Leste.
“Ita-nia programa hotu-hotu, ita la mai ho ita-nia programa. Ami dezenvolve hela ami nia programa sira hamutuk ho governu,” nia dehan.
Nia mós agradese ba apoiu husi Governu Japaun ne’ebé apoiu UNFPA nia serbisu iha Timor-Leste.
Kona-ba implementasaun, nia dehan prosesu programa nian la’o hela ona no sei hala’o entre Governu Timor-Leste ho UNFPA.
Vise Primeiru-Ministru hanesan Ministru Koordenadór Asuntu Sosiál mak sei koordena implementasaun programa ne’e hamutuk ho liña ministériu relevante sira.
Jornalista : Hortêncio Sanchez
Editór : Cancio Ximenes
