Ataúru sei hetan sistema fornesimentu enerjia íbridu ho valór millaun $13,5
DILI, 11 Setembru 2026 (TATOLI) – Konsellu Ministru delibera hodi autoriza despeza no abertura prosedimentu aprovizionamentu ba konstrusaun no instalasaun Sistema Fornesimentu Enerjia Íbridu iha illa Ataúru, ho valór estimadu millaun $13,5.
Sekretáriu Estadu Komunikasaun Sosiál, Expedito Dias Ximenes, hatete katak projetu ne’e aprezenta husi Ministru Obra Públika, Samuel Marçal.
Nia esplika projetu ne’e prevee instalasaun sistema fornesimentu enerjia ne’ebé kombina painél solár fotovoltáiku, sistema armazenamentu enerjia iha bateria no jeradór diesel modernu sira.
” Objetivu husi projetu ne’e atu garante fornesimentu eletrisidade ida ne’ebé estavel no efisiente liu iha oras 24 nia laran, hodi hamenus kustu produsaun no kontribui ba dezenvolvimentu illa nian no hadi’a kondisaun moris populasaun nian”, Expedito Dias Ximenes informa.
Nia dehan katak Konsellu Ministru fó ona autorizasaun atu hala’o prosesu aprovizinamentu ba projetu ne’e, ne’ebé sei hadi’a asesu populasaun Ataúru ba eletrisidade durante oras 24. Daudaun, fornesimentu eletrisidade iha illa ne’e dura entre oras 12 to’o18 de’it kada loron.
Jornalista: Arminda Fonseca
Editora: Maria Auxiliadora
