Atividade PNDS iha Suku Osso-Huna sei ramata iha fulan-Outubru
BAUKAU, 11 Setembru 2026 (TATOLI)—Autoridade Suku Osso-Huna, Postu Administrativu Baguia, Munisípiu Baukau, garante sei finaliza atividade regulár Programa Nasionál Dezenvolvimentu Suku (PNDS) iha fulan-Outubru.
Xefe suku Osso-Huna, Paulo dos Reis Piedade, esplika atividade regulár ne’ebé implementa liuhusi konstrusaun kampu multifunsaun referida hahú iha inísiu fulan ne’e iha-ne’ebé atinje ona pursentu 20-resin kompostu husi finaliza ona fondasi, ateru no harii ai-rin hodi kesi airame morru.
“Atualmente iha ona faze konstrui fondasi no tuir kalkulasaun sei finaliza iha fulan oin (Outubru),” Xefe Suku Osso-Huna informa iha Vila Nova, Baukau, Sesta ne’e.
Paulo Piedade relata kampu multifunsaun referida sei fasilita juventude iha área Osso-huna atu utiliza ba atividde desportu hanesan voli, basketball no futeból salaun iha-ne’ebé hetan alokasaun orsamentu hamutuk rihun $34.
“Ami implementa tarde tanba ami hadi’a estrada ne’ebé kotu ne’e, maibé bainhira ramata bele fasilita hodi halo atividade desportu,” Paulo Piedade akresenta.
Entretantu, Suku Osso-Huna hamutuk aldeia tolu kompostu husi Betulari, Uaikadae no Uaibuitai ho totál populasaun 894 kompostu mane 434 no feto 460 husi uma-kain 204.
Jornalista: Natalino Belo
Editór: Xisto Freitas da Piedade
