Eis Funsionáriu UNAMET 341 husi Kovalima prepara partisipa kongresu nasionál iha Dili
KOVALIMA, 11 Setembru 2026 (TATOLI)- Eis funsionáriu no eis Poling Staff UNAMET Munisípiu Kovalima realiza enkontru hodi halo preparasaun atu partisipasaun Kongresu Nasionál, ne’ebé sei realiza iha Centru Konvensaun Díli (CCD).
UNAMET (United Nations Mission in East Timor) harii iha 1999 hodi organiza no hala’o Konsulta Populár iha 30 Agostu 1999. Misaun ne’e kompostu husi funsionáriu internasionál no Timor-oan sira ne’ebé servisu hanesan funsionáriu lokál.
Eis-Kordenadór UNAMET Munisípiu Kovalima, Alberto Moniz de Araújo, hatete katak eis funsionáriu no Poling Staff UNAMET husi Kovalima hamutuk 341 sei partisipa iha Kogresu Nasionál.
Nia hatete katak delegasaun ne’e kompostu husi reprezentante husi postu administrativu 7 no sentru votasaun 16. Postu Suai Vila sei haruka ema na’in 80, Zumalai delegadu 19, Tilomar ema na’in 10 no postu administrativu haat seluk ema na’in-hitu , inklui koordenadór postu sira no estrutura UNAMET Munisípiu Kovalima.
“Delegasaun husi Kovalima sei viajen ba Díli iha 24 Setembru atu bele partisipa iha Kogresu Nasionál durante loron rua, husi 25 to’o 26 Setembru, iha Centru Konvensaun Díli,” Eis-Kordenadór UNAMET Munisípiu Kovalima Alberto Moniz de Araújo informa ba jornalista sira iha salaun AMC.
Nia konsidera partisipasaun iha kongresu ne’e importante, liuliu atu fó atensaun ba eis Funsionáriu UNAMET no eis Poling staff sira ne’ebé fó kontribuisaun iha prosesu luta ba ukun-rasik-an.
Alberto hatete katak, iha situasaun difísil durante Konsulta Populár iha 30 Agostu 1999, funsionáriu UNAMET no Poling Staff sira prontu atu hala’o sira-nia kna’ar maski hasoru situasaun ne’ebé ameasa sira-nia moris.
Kongresu Nasionál ne’e sei fó oportunidade ba eis Funsionáriu UNAMET no eis -Poling Staff sira atu hato’o sira-nia aspirasaun no lori rezultadu kongresu ba membru Governu no Estadu, hodi kontinua tau matan ba sira-nia kontribuisaun iha luta ba ukun-rasik-an.
“UNAMET hotu-hotu hamutuk atu realiza kongresu ida-ne’e, atu bele lori rezultadu husi Kogresu Nasionál hato’o ba membru Governu no Estadu, atu tau matan nafatin ba ami eis -Funsionáriu UNAMET no eis Poling Staff sira ne’ebé hola parte ona iha kontribuisaun ba ukun-rasik-an, ne’ebé halo ona tinan 27,” nia dehan.
Jornalista: Celestina Teles
Editór: Florencio Miranda Ximenes
