Fernanda Lay atualiza progresu Parlamentu Nian ba Prezidente Repúblika
DILI, 11 Setembru 2026 (TATOLI)–Prezidente Parlamentu Nasionál, Maria Fernanda Lay, hateten objetivu enkontru ho Prezidente Repúblika, José Ramos-Horta, hodi halo de’it atualizasaun ba Xefe Estadu kona-ba atividade sira iha Parlamentu Nasionál.
“Objetivu enkontru ho Prezidente Repúblika atu mai atualiza de’it ba Prezidente Repúblika tanba iha loron 15 agora Prezidente Repúblika sei hato’o diskursu ba Povu iha Parlamentu Nasionál,” Fernanda Lay informa ba jornalista sira iha Palásiu Prezidensiál Nicolau Lobato Dili, sesta ne’e, hafoin enkontru ho Prezidente Repúblika.
Iha enkontru ne’e, Prezidente Parlamentu mós informa ba Prezidente Repúblika kona-ba progresu iha terseira sesaun lejislativa.
“Informa ba Prezidente Repúblika kona-ba progresu sobre kriasaun Komisaun ba rekrutamentu juiz ita-nian. Ida-ne’e mós nia progresu,” nia dehan.
Tuir nia, iha mós relatóriu kona-ba atividade sira-ne’ebé hala’o ona inklui partisipasaun iha ámbitu internasionál.
Relata Vizita Ba Angola, Austrália no Kambodia
Prezidente Parlamentu relata mós kona-ba nia vizita ba Angola hodi partisipa Asembleia Parlamentár.
Nia mós relata kona-ba konvite husi Parlamentu no Senadu Austrália nian kona-ba progresu traballadór Timor-Leste sira ne’ebé hala’o servisu iha nasaun ne’e.
“Vizita ba Austrália nian, tanba iha konvite ida ba Parlamentu ho Senadu Austrália nian kona-ba progresu traballadór iha ne’ebá. Halo oinsá mak saida, mai ha’u hato’o,” nia esplika.
Aleinde ne’e, Maria Fernanda Lay mós partisipa misaun pas no solidaridade iha Kambodia.
“Konvite terseiru, foin lalais ha’u ba iha Kambodia partisipa misaun ba pás no solidaridade ba ita-nia nasaun sira seluk ne’ebé iha situasaun la di’ak entre sira ho sira-nia nasaun viziñu hanesan Tailándia ho Kambodia. Ne’ebé, Timor-Leste ba partilla esperiénsia ita-nian ne’ebé ita iha problema uluk ho Indonézia no ho Austrália rasik kona-ba ita-nia fronteira marítima,” nia dehan.
Jornalista : Hortêncio Sanchez
Editór : Cancio Ximenes
