FRETILIN apela ba unidade timoroan hodi kore povu husi ki’ak
DILI, 11 Setembru 2026 (TATOLI) – Prezidente Interinu no Sekretáriu-Jerál Partidu Frente Revolusionária Timor-Leste Independente (FRETILIN), Marí Alkatiri, apela ba timoroan hotu atu unidade hodi ba luta ba kauza ida hamutuk, atu kore povu husi mukit no ki’ak.
Nia hato’o mensajen ne’e iha selebrasaun loron transformasaun Asosiasaun Sosiál Demokrátika Timorense (ASDT) ba FRETILIN, ne’ebé ohin kompleta tinan 52.
Alkatiri dehan data 11 Setembru sai momentu importante atu hanoin filafali fundasaun ASDT no desizaun atu transforma organizasaun ne’e ba FRETILIN, hodi responde ba povu nia hakarak atu kore an husi dominasaun estranjeira.
Nia esplika katak, iha tempu ne’ebá, kolonializmu Portugés dehan kolonializmu laiha tan, no fó oportunidade ba povu kolonializadu sira atu deside sira-nia direitu atu hili. Maibé, situasaun ne’e nafatin lori perigu ba Timór tanba iha ambisaun rejionál.
Tanba ne’e, fundadór ASDT foti desizaun atu transforma organizasaun ne’e ba FRETILIN, atu harii organizasaun ida ne’ebé bele halibur ema hotu, liuliu patriota no nasionalista sira, atu hasoru dezafiu boot sira ne’ebé atu mai husi tasi, anin no rai.
“Ne’e mak 11 Setembru ASDT [no] 20 Maiu, rua ne’e hotu iha 1974. Iha tempu ne’ebá ami hotu deside”, nia hatete iha konferénsia imprensa iha estúdiu MA Podnaroman, Faról, Dili, sesta-feira ne’e.
Líder nasionál ne’e salienta katak, iha inísiu, FRETILIN moris ho karáter la’ós hanesan partidu, maibé organizasaun ne’ebé bele halibur ema hotu ne’ebé hakarak indepedénsia.
Nia realsa katak, ohin depoizde tinan 52, no tinan rua molok FRETILIN lansa jornada foun ba tinan 50, partidu ne’e kontinua buka kauza ida ho partisipasaun tomak husi povu atu kore an husi mukit no ki’ak.
“Ohin tinan 52, se mak ukun-rasik rekoñese ona ki’ak sei barak, maibé la esplika tanba saida ki’ak sei iha, primeiru tanba laiha unidade”, nia dehan.
Alkatiri salienta katak, nasiolista no patriota hotu bele iha sira-nia organizasaun no partidu, maibé iha kauza ida-ne’e, tenke iha unidade. Nia hatete katak, unidade ne’e mak polítika FRETILIN nian agora.
“Ho ida-ne’e, antes ne’e FRETILIN lansa ona moto ida ‘Unir para Transformar’, tanba uluk ita dehan ‘unir para libertar’, ohin atu transforma”, nia afirma.
Alkatiri apela patriota no nasiolista tomak atu halo balansu ba tinan 52 ne’ebé liu ona noi hateke ba oin.
Iha loron transformasaun ASDT ba FRETILIN, Sekretáriu-Jerál ne’e reafirma pozisaun uluk katak FRETILIN hakarak Timor-Leste sai “jardín” ida ba timoroan hotu.
“Atu halo apelu filafali mai ita hamutuk atu hateke ba oin. Saida mak loos, ita hametin, sala hamutuk hadi’a. Povu hein hela mak ne’e duni”, nia hato’o.
Kona-ba medida sira ne’ebé presiza foti atu kombate ki’ak, Alkatiri hatete katak, tinan 24 depois país restaura independénsia, povu ki’ak sei barak tanba korrupsaun no governasaun sala.
Nia sujere ba Governu atu halo mudansa iha kultura lideransa hodi hadi’a governansaun no kombate ki’ak.
Notísia relevante: Alkatiri apela ba líder sira hamutuk buka dalan atu iha entendimentu
Jornalista: Nelson de Sousa
Editora: Maria Auxiliadora
