Governu nomeia Nelinho Vital ba vogál efetivu Konsellu Superiór Majistratura Judisiál

DILI, 11 Setembru 2026 (TATOLI)-Governu ezonera Alexandre Gentil Corte-Real de Araújo no nomeia Nelinho Vital ba ninia substituisaun, hodi hala’o knaar nu’udar vogál efetivu Governu nian iha Konsellu Superiór Majistratura Judisiál, ba mandatu tinan haat.

Projetu Rezolusaun Governu ne’e aprezenta husi Ministru Justisa, Sérgio Hornai.

Sekretáriu Estadu Komunikasaun Sosiál, Expedito Dias Ximenes, informa katak Konsellu ida-ne’e nia kompeténsia atu jere no haree ba disiplina husi atividade majistradu judisiál sira-nian nomós nomeasaun, kolokasaun, transferénsia no promosaun juis sira iha Timor-Leste.

Tuir nia, Konsellu Superiór Majistratura Judisiál prezide husi Juis Prezidente Supremu Tribunál Justisa no kompostu hosi vogál na’in-haat, ida Governu maka nomeia.

Tanba ne’e, Nelinho Vital substitui Gentil Corte-Real de Araújo tanba daudaun nia tama iha kandidatura Juis Tribunál Supremu ne’ebé prosesu la’o hela, entaun atu labele iha konflitu interese, Ministériu Justisa tenke hili ninia troka.

Aleinde ne’e, Ministru Sérgio Ornai mós informa ba Konsellu Ministru kona-ba prosesu renovasaun pasaporte ba sidadaun timoroan sira ne’ebé hela no servisu iha Izraél, hala’o ba dahuluk diretamente iha nasaun ne’ebá, iha koordenasaun ho Ministériu Negósiu Estranjeiru no Kooperasaun.

Konsellu Ministrus haree mós vídeo ida ne’ebé haruka husi komunidade timoroan iha Izraél, iha ne’ebé sira hato’o agradesimentu ba Governu ba inisiativa ne’e, ne’ebé fasilita asesu ba renovasaun dokumentu viajen nian no evita nesesidade atu halo viajen bá nasaun sira seluk ba objetivu ne’e.

Jornalista: Arminda Fonseca 

Editora: Maria Auxiliadora