Merkadu Multi Suku iha Osso-Huna hahú faze konstrusaun
BAUKAU, 11 Setembru 2026 (TATOLI)—Projetu Merkadu Multi Suku ne’ebé finansia husi Autoridade Munisipál Baukau (AMB) liuhusi Programa Dezenvolvimentu Integradu Munisipál (PDIM) iha Suku Osso-Huna, Postu Administrativu Baguia, iha faze konstrusaun.
Xefe Suku Osso-Huna, Paulo dos Reis Piedade, esplika projetu referidu hahú lansa iha inísiu fulan-ne’e iha-ne’ebé parte kompañia responsável hahú mobiliza materiál inklui ke’e no hada fondasi ne’ebé utiliza rai metru 50m² ne’ebé lokaliza iha Aldeia Uaekadae.
“Suku hotu hakarak projetu PDIM maibé ami agradese hili ona Osso-huna nune’e durante implementasaun ami sei kontrola nune’e projetu ne’e bele finaliza tuir kontratu,” Xefe Suku Osso-huna informa ba iha Vila Nova, Sesta ne’e.
Paulo Piedade relata merkadu multa suku ne’e atu fasilita komunidade liuliu negosiante sira husi Suku Osso-Huna, Haekoni, Afaloikai inklui suku viziñu sira husi Postu administrativu Uatukarbau no Uatulari, Munisípiu Vikeke, hodi hala’o atividade ekonomia.
Aleinde ne’e, projetu referida nu’udár responde husi AMB bazeia ba ezijénsia autoridade postu no Suku Baguia ho medida naruk metru 24 no luan metru 15 tanba haree ba fatór distánsia inklui estrada nune’e bele hakbesik negósiu ba komunidade iha rurál.
“Agradese tanba fasilita ona komunidade fa’an produtu besik bá iha merkadu,” Paulo Piedade tenik.
Entretantu, projetu Konstrusaun Merkadu Multi Suku responsabilidade husi kompañia lokál Nautetu, Lda, ho orsamentu hamutuk $122.495,60 iha-ne’ebé tuir kontratu durasaun tinan-ida husi Jullu 2026 to’o Jullu 2027.
Jornalista: Natalino Belo
Editór: Xisto Freitas da Piedade
