MS garante rekrutamentu profisionál saúde ne’ebé loke ba publiku la’o ho di’ak
DILI, 11 Setembru 2026 (TATOLI)– Ministra Saúde, Elia dos Reis Amaral, garante katak prosesu rekrutamentu ba profisionál saúde ne’ebé Hospital Nasionál Guido Valadares (HNGV) loke ba públiku la’o ho justu no transparénsia.
Notísia Relevante:
“Ne’e sei justu, legál, tuir regra ne’ebé iha, atu nune’e bele iha transparénsia. Ita garante ida-ne’e, tanba ami forma ona komisaun rekrutamentu ida atu responsabiliza ba prosesu selesaun profisionál saúde sira-ne’ebé sei konkorre ba vaga hirak ne’e,” Ministra Saúde, Elia dos Reis hateten ba jornalista sira iha Palásiu Governu,ohin.
Nia hateten, rekrutamentu ne’e la’ós de’it ba HNGV maibé sei prepara mós ba munisípiu sira, tanba Ministériu Saúde presiza hasa’e atendimentu iha fasilidade saúde sira iha munisípiu, ne’ebé mós presiza rekursu umanu ne’ebé adisionál.
Vaga ne’ebé HNGV loke hamutuk 478 ba profisionál saúde, ho períodu submisaun dokumentu hahú husi Segunda-feira, 07 Setembru to’o loron 18 Setembru 2026, durante oras servisu, iha Hospital António Carvalho Lahane.
Vaga 478 ne’e kompostu husi Médiku Jeral Juniór A/1 ne’e vaga hamutuk 112, Enfermeiru Jerál Juniór A/1 hamutuk vaga 236, Enfermeiru Jerál Júnior B/1 hamutuk vaga 14, Asistente Enfermeiru Jerál hamutuk vaga 30, Parteira Jerál Juniór A/1 hamutuk vaga 25, Parteira Jerál Juniór B/1 hamutuk vaga 10, Tékniku Radiolojia, TDTSP Jerál Juniór A/1 hamutuk vaga 10.
Tékniku Analista Laboratóriu, TDTSP Jerál Juniór A/1 hamutuk vaga haat (4), Tékniku Analista Banku de Sangue, TDTSP Jerál Juniór A/1 hamutuk vaga tolu (3), Tékniku Fisioterapia, TDTSP Jerál Juniór A/1 hamutuk vaga rua (2), Tékniku Biomediku, TDTSP Jerál Juniór A/1 hamutuk vaga tolu (3), Tékniku Nutrisaun, TDTSP Juniór A/1 hamutuk vaga tolu (3), Tékniku Medical Record, TDTSP Juniór A/1 hamutuk vaga haat (4).
Tékniku Farmásia, TDTSP Juniór A/1 hamutuk vaga lima (5), Tékniku Radiolojia, TDTSP Jerál Junior B/1 hamutuk vaga rua (2), Tékniku Fisioterapia, TDTSP Jerál Juniór B/1 hamutuk vaga rua (2), Tékniku Biomediku, TDTSP Jerál Juniór B/1 hamutuk vaga rua (2), Refkrasionista, TDTSP Jerál Juniór B/1 hamutuk vaga rua (2), Tékniku Medical Record, TDTSP Jerál Juniór B/1 hamutuk vaga rua (2), Tékniku Farmásia, TDTSP Jerál Junior B/1 hamutuk vaga tolu (3) no Asistente TDTSP hamutuk vaga rua (2).
HNGV determina kór mapa diferensa ba kada área profisionál inklui kór verde ba Médiku Jerál, azul ba Enfermajen, mean ba Parteira, kinur ba Tékniku Aliadu/TDTSP, laranja ba Asistente Enfermajen no chocolate ba Asistente TDTSP.
Antes ne’e, Diretór Servisu Apoiu Diagnóstiku no Terapeutiku HNGV, Vidal de Jesus Lopes, hateten katak rekrutamentu ne’e objetivu atu reforsa rekursu umanu no hadi’a kualidade servisu saúde ba komunidade.
Nia hateten, HNGV iha ona orsamentu ba rekrutamentu funsionáriu iha tinan 2026, inklui médiku, parteira, enfermeiru, tékniku aliadu no asistente enfermajen.
“Ha’u bele informa ba públiku katak Hospital Nasionál prevee ona orsamentu ba rekrutamentu ba tinan ida-ne’e. Rekrutamentu ba funsionáriu sira-ne’e kompostu husi médiku, parteira, enfermeiru, tékniku aliadu no asistente enfermeiru, ba orsamentu ha’u sei la temi maibé enprinsipiu ami prevee,” nia esplika.
Nia subliña, prosesu rekrutamentu ne’e hala’o liuhusi koordenasaun administrativa entre Hospital Nasionál Guido Valadares, Ministériu Saúde no Komisaun Funsaun Públika.
Jornalista : Felicidade Ximenes
Editór : Cancio Ximenes
