OJE 2027 fó prioridade ba eleisaun Prezidensiál
DILI, 11 Setembru 2026 (TATOLI)–Primeiru-Ministru, Kay Rala Xanana Gusmão, hateten Governu agora foku hela ba preparasaun Orsamentu Jerál Estadu (OJE) 2027, tanba iha loron 01 Outubru tenke haruka ona ba Parlamentu Nasionál.
Xanana hateten, iha fulan ikus ne’e sira tinan 2026, Governu sei foku liu ba OJE 2027 atu fó prioridade sira-ne’ebé Governu haree mak ba realizasaun eleisaun Prezidensiál, preparasaun Timor-Leste nian ba ASEAN, no mós asaun sira-ne’ebé sei implementa iha 2027 no 2028 hodi prepara nasaun asume responsabilidade boot iha 2029.
“Prioridade sira ita haree mak ba eleisaun Prezidensiál, ASEAN nia preparasaun ho buat ruma ne’ebé ita prepara iha 2027 no 2028. Nune’e hotu tiha 2029, ita bele asume fali responsabilidade hodi lidera nomós CPLP nian ita ka’er hotu iha dezembru tinan 2027,” Xanana hato’o asuntu ne’e ba jornalista sira iha Palásiu Prezidensiál Nicolau Lobato, hafoin enkontru ho Prezidente Repúblika, José Ramos-Horta, ohin.
Primeiru-Ministru reforsa tan katak asaun sira ligadu ho ASEAN sei nafatin sai prioridade boot ba Governu.
“ASEAN nian sei sai nafatin prioridade boot ida ba ita,” nia dehan.
Nia hatutan, prosesu elaborasaun orsamentu tinan oin ne’e sei difisil, tanba Governu tenke tau prioridade ba programa oioin.
“Ita temi ona orsamentu ne’e, difisil uitoan, tanba atu fó prioridade ba ida-ne’e, fó prioridade ba ida ne’ebá,” nia dehan.
Jornalista : Hortêncio Sanchez
Editór : Cancio Ximenes
