RAEOA reabilita sistema bee-moos ba sub-rejiaun haat ho kustu rihun $44-resin
OEKUSI, 11 Setembru 2026 (TATOLI) – Autoridade Rejiaun Administrativa Espesiál Oekusi Ambeno (RAEOA), liderada Régio da Cruz Salu, sesta ne’e, hatuur fatuk-inan, ba projetu reabilitasaun sistema kanalizasaun no gravitasaun bee-moos haat hodi konstrui ba rejiaun Oésilo, Pásabe, Nítibe no sub-rejiaun Pante Makasar ho verba rihun $44,244.16.
Serimónia hatuur fatuk dahuluk ne’e, simboliza iha aldeia Oénoah suku Bobometo sub-rejiaun Oésilo, ne’ebé partisipa direita husi jestór sub-rejiaun haat inklui Konsellu- Suku sira.
Projetu sistema kanalizasaun no gravitasaun bee-moos haat ne’e maka hanesan, bee-matan Oélbonak lokaliza iha aldeia Pássabe suku Abani sub-rejiaun Pássabe, bee-matan Oélnus lokaliza iha aldeia Oénoah suku Bobometo sub-rejiaun Oésilo, bee-matan Oéltune lokaliza iha aldeia Nítibe suku Usitaku sub-rejiaun Nítibe no bee-matan Oétulu lokaliza iha aldeia Sanane suku Costa sub-rejiaun Pante Masakar.
“Obra haat ne’e ita prioriza iha orsamentu 2026 atu halo manutensaun ba sistema bee-moos, katak sistema ne’e harii ona iha tinan hirak kotuk, tinan ne’e ita atu halo reabilitasaun, ne’e fas parte ba jestaun foste ‘agua sira no sistema ne’ebé estabelese ona,” nia hateten iha ámbitu seremónia lansamentu hala’o iha aldeia Oénoah suku Bobometo.
Iha biban ne’e, autoridade ne’e, rekomenda ba empreza konstrutóra atu finaliza iha períodu tempu bailoron, nune’e iha tempu udan monu rai debitu bee-matan bee aumenta. Aleinde ne’e mós nia husu ba komunidade sira no entidade iha suku no aldeia atu apoia no koopera, nune’e projetu reabilitasaun bele konklui bazeia durasaun kontratu.
Notísia relevante:Autoridade RAEOA ho Rotary Club inaugura instalasaun filtra bee-moos iha ETV Palaban
Diretór Servisu Rejionál Água Saneamentu Oekusi, José Ili, informa, katak, kada tinan problema bee-moos akontese iha fatin-fatin, tan ne’e iha 2025, Autoridade RAEOA integra iha iha Planu Asaun Anuál (PAA) Orsamentu Jerál Estadu (OJE) 2026, hodi halo manutensaun ba sistema ne’ebé iha ona iha 2026 ne’e.
Nia hateten katak, obra sira-ne’e, prioridade ba sistema haat ne’e, hanesan bee-matan iha Oénoah presiza konsidera tanba iha tinan rua liubá, projetu alargamentu estrada hetan estragu nune’e tinan kotuk, prioriza atu reabilita iha tinan ne’e, hanesan mós ho bee-matan Oéltune iha Nítibe no Oétulu no Oélbonak hetan estragu husi projetu alargamentu estrada.
“Obra haat ne’e nia verba rihun $44,244.16, ne’ebé kada sistema gasta rihun $10-resin, maske fundu ne’e ki’ikoan maibé ita tenki tau ba planu hodi halo manutensaun ba sistema ne’ebé antes ne’e eziste ona, tanba uluk parsériu dezenvolvimenti sira hanesan ONG no ajénsia sira mak inisía,” nia hateten.
Notísia relevante:Populasaun Oekusi, 22% mak seidauk asesu bee-moos ho di’ak
Iha biban ne’e, Xefe Aldeia Oénoah, Cipriano Quenat, orgullu tanba Governu liuhusi Autoridade RAEOA prioriza asuntu bee-moos ba komunidade sira-ne’ebé enfrenta problema bee-moos.
“Ha’u kontenti tebes. Ami hein tinan barak ona, klaru katak uluk ONG mak apoia ami, maibé tinan barak ona, laiha manutensaun, entaun, kada loron ami tenke dudu karosa ba kuru direita iha bee-matan, ne’ebé ami promete sei servisu hamutuk ho kompañia, atu halais projetu ne’e, tanba agora tempu bailoron, tempu udan karik, bee ne’e bele aumenta tan,” nia orgullu.
Notísia relevante:Abitante 16 iha Bairru Sikone Pante Makasar seidauk asesu bee-moos no liña elétrika
Entretantu, projetu reabilitasaun sistema kanalizasaun no gravitasaun bee-matan ne’e, responsabiliza husi kompañia lokál Tes Neno Unipesoál Lda ho valór kontratu $44,244.16, verba ne’e Autoridade RAEOA aloka husi Orsamentu Jerál Estadu (OJE) 2026 nian ho durasaun servisu fulan neen, hahú iha loron 01 Setembru 2026 sei finaliza iha loron 01 Fevereiru 2027.
Jornalista: Abílio Elo Nini
Editór: Rafael Ximenes de A. Belo
