ACELDA esporta kamii tonelada 750 ba Indonesia iha trimestre dahuluk 2026
DÍLI, 14 Setembru 2026 (TATOLI) – Kompañia ACELDA Unipessoal, Lda, esporta ona kami hamutuk tonelada 750 ba Indonesia durante períodu Janeiru to’o Agostu 2026.
Diretór Kompañia ACELDA Unipessoal, Lda, Higino da Costa Freitas, hateten katak rezultadu ne’e hatudu dezenvolvimentu pozitivu iha setór agronegósiu nasionál no kontribui ba aumentu rendimentu agrikultór sira iha área rurál.
“Esportasaun kamii ba Indonesia hatudu katak produtu lokál Timor-Leste iha poténsia boot atu kompete iha merkadu estranjeiru. Ami kontinua servisu hamutuk ho agrikultór sira atu asegura kualidade produtu no aumenta kapasidade produsaun,” Higino hateten ba TATOLI iha nia servisu-fatin, Lecidere, Díli, ohin.
Nia esplika katak merkadu Indonesia kontinua hatudu interese aas ba kamii, tanba produtu ne’e iha benefísiu oioin ba saúde no uza ba iha indústria alimentár no kosmétika.
“Desde tinan 2023 to’o agora, ACELDA kontinua esporta kamii ba Indonesia tanba demanda merkadu ne’ebé aas. Importadór sira iha nasaun ne’e kontinua husu atu ita Esporta ho kuantidade boot,” nia dehan.
Higino hateten katak, durante prosesu esportasaun, kompañia tenke kumpre rekizitu sanitáriu no padraun kualidade internasionál sira ne’ebé estabelese husi importadór Indonesia, atu garante katak produtu lokál sora bele lori ba merkadu ho diak no mantein konfiansa konsumidór sira.
“Objetivu kompañia nian la’ós de’it aumenta esportasaun, maibé mos kria oportunidade rendimentu ba agrikultór no komunidade produtór sira iha Timor-Leste,” nia dehan.
Nia subliña katak kami ne’ebé ACELDA esporta ba Indonesia sosa diretamente husi agrikultór sira iha munisípiu Baucau, Viqueque no Lautém, ho folin US$1,05 kada kilograma.
ACELDA Unipessoal, Lda, mak kompañia nasionál ida ne’ebé envolve iha produsaun no esportasaun produtu agríkola no lori kami ba merkadu internasionál.
Durante ne’e Governu Timor-Leste no TradeInvest fó apoiu ba kompañia ne’e atu partisipa iha feira internasionál sira no buka oportunidade atu loke dalan produtu timoroan.
Desde tinan 2005, ACELDA esporta mina kami orgániku ba Estados Unidos da Amérika. Aleinde ne’e, kompañia mós produz foos mean lokál no foos metan lokál, ne’ebé iha poténsia atu esporta.
Agra dadaun, kompañia hahú halo expansaun negósiu ba produtu kosmetika, inklui sabun no Sampo, ne’ebé uza mina kami no mina nuu hanesan matéria-prima.
Iha tinan 2023, Governu Timor-Leste fó Business Excellent Award 2023 ba ACELDA, hanesan rekoñesimentu ba nia kontribuisaun signifikativu iha dezenvolvimentu ekonomia nasionál, kriasaun empregu no promosaun produtu timoroan iha merkadu internasionál.
Jornalista: Camilio de Sousa
Editór: Filomeno Martins
