AMB fó-sai karta sirkulár kombate Raiva iha Baukau
BAUKAU, 14 Setembru 2026 (TATOLI)—Autoridade Munisipál Baukau (AMB) deside fó-sai karta sirkulár atu prevene no kombate vírus Raiva iha Baukau.
Prezidente Autoridade Munisípal Baukau, Veneranda Lemos, esplika desizaun referida foti liuhusi reuniaun Konsellu Koordeansaun Munisipál (KKM) ho objetivu fó poder ba Task Force Baukau Zero ba Moras Raiva (BAZERA) atu define medida ne’ebé foti ba asu sira-ne’ebé abandonadu iha fatin públiku.
“Sirkulár ne’e sai hanesan termu legál ida ba ema sira-ne’ebé iha asu no ba asu sira-ne’ebé ita hetan iha fatin públiku,” Prezidenti Autóridade Munisipál Baukau hateten iha Vila Nova, Segunda ne’e.
Eis deputada ne’e relata hafoin karta sirkulár referidu aprova no asina kontinua distribui ba postu administrativu no suku hotu hodi tranzmite ba komunidade molok ekipa konjunta ezekuta iha terrenu.
Konteúdu husi karta sirkulár mak informa ba komunidade ne’ebé haki’ak asu tenke kontrola no izola iha fatin seguru liuliu bandu husik livre iha fatin públiku tanba bele fó ameasa seguransa ba ema seluk.
Asu ne’ebé la’o livre iha estrada no fatin públiku, bainhira autoridade kompetente hetan, sei halo apreensaun no eliminasaun tuir medida ne’ebé determina iha sirkulár.
“Husi hau-nia parte, asu ka busa sira-ne’ebé la’o iha estrada ne’e konsidera na’in laiha, no ekipa konjunta bele elimina,” Veneranda Lemos akresenta.
Entretantu, tuir dadus, Ekipa Task Force Baukau Zero ba Moras Raiva (BAZERA) durante inísiu tinan-ne’e rejista vítima ba vírus raiva ka asu tata hamutuk na’in-742 iha Baukau kompostu husi mane hamutuk 399 no feto 343 ho totál mate na’in-haat no kazu suspeitu na’in-ida.
Husi totál vítima na’in-742 rejistadu iha Janeiru hamutuk 46, Fevereiru 27, Marsu 43, Abríl 78, Juñu 149, Jullu 107 no Agostu hamutuk na’in-140 ne’ebé maioria lokaliza iha Postu Baukau Vila hanesan Bahú kazu hamutuk 117, Tirilolo 113, Gariuai 77, Uailili 54, Buibau 28, Buruma 16, Builai 16, Bukoli 19 no Samalari kazu hamutuk 13.
Aleinde ne’e, Postu Venilale iha Suku Uatuhako kazu hamutuk 21, Postu Vemasse iha Suku Vemasse Tasi 21 no Postu Kelikai iha Suku Letemumu hamutuk kazu 16.
Jornalista: Natalino Belo
Editór: Xisto Freitas da Piedade
