Autoridade suku husu MS harii postu saúde iha Defauasi

BAUKAU, 14 Setembru 2026 (TATOLI)—Autoridade Suku Defauasi, Postu Administrativu Baguia, Munisípiu Baukau, husu Governu Sentrál liuhusi Ministériu Saúde (MS) atu harii postu saúde hodi hakbesik komunidade asesu ba fasilidade saúde.

Xefe Suku Defauasi, Salustiano Ximenes Guterres, esplika difikuldade referida enfrentadu tanba husi inísiu ukun-an to’o agora komunidade Defauasi seidauk iha fasilidade hanesan postu saúde nune’e obrigadu tenke la’o dook no hakur mota bainhira atu hetan tratamentu ba saúde.

“Presiza duni konstrui postu saúde ida iha-ne’ebá, tanba bainhira ita-nia komunidade enfrenta moras, difísil tebes atu asesu ba fasilidade saúde,” Xefe Suku Defauasi hateten iha Vila Nova, Baukau, Segunda ne’e.

Salustiano Guterres relata maioria komunidade bainhira bá hala’o tratamentu tenke la’o ain kilómetru hitu no hakur mota tolu ba postu saúde iha Suku Lavateri, enkuantu ba sentru saúde iha Baguia Vila hamutuk distánsia kilómetru sia iha-ne’ebé iha dalan aternativu rua hanesan husi Suku Samalari hakur mota Samalari no Alawa Kraik atravesa mota Lakamutu.

Aleinde ne’e, pasiente balun obrigadu tenke utiliza motór tanba Sentru Saúde Baguia sei menus fasilidade liuliu bainhira ambulánsia halo atendimentu iha fatin seluk, pasiente grave tenke tula ho motór hodi bá fasilidade saúde hodi hetan atendimentu emerjénsia husi pesoál saúde.

“Kada semana sempre iha na’in-rua to’o-tolu mak transporta ho motór,” Solustiano Guterres haktuir.

Lider Defauasi ne’e hateten autoridade suku hato’o ona preokupasaun ne’e ba autoridade kompetente (Ministériu Saúde) atu konstrui postu saúde ida iha Suku Defauasi maibé to’o agora seidauk iha solusaun.

Entretantu, Suku Defauasi hamutuk aldeia haat kompostu husi Defauasi, Lari-Bere, Sae-Meta no Uarou, ho totál populasaun hamutuk 1.240, mane na’in-615 no feto na’in-625 husi totál uma-kain 260.

Jornalista: Natalino Belo 

Editór: Xisto Freitas da Piedade