Komisaun A husu garante transparénsia iha prosesu rekrutamentu juis ba STJ
DILI, 14 Setembru 2026 (TATOLI) – Prezidente Komisaun A ne’ebé trata Asuntu Konstitusionál no Justisa, Natalino dos Santos, husu ba komisaun rekrutamentu atu garante transparénsia iha prosesu rekrutamentu juis ba Supremu Tribunál Justisa (STJ).
Nune’e, nia solisita ba komisaun rekrutamentu atu tuir nafatin regra sira ne’ebé iha hodi garante transparénsia iha prosesu ne’e.
Tuir nia, STJ nu’udar tribunál ida aas liu la’ós atu julga krime sira, maibé atu julga dokumentu sira ne’ebé husu inkonstitusionalidade. Ho ida ne’e, deputadu ne’e ezije ba kualidade no méritu husi kandidatu sira.
“Ema ne’ebé komprende didi’ak regra, Konstituisaun, interpreta legalidade hodi ninia desizaun ikus bele fó satisfasaun parte hotu”, nia hatete.
Kestiona kona-ba pesoál ne’ebé hola parte iha komisaun rekrutamentu, deputadu dehan, ida-ne’e depende ba regra ne’ebé iha, maibé Parlamentu sei haree ba kestaun ne’e depoizde resesu.
Ba nia, importante tebes atu estabelese STJ, tanba país sai ona Estadu ida no iha Konstituisaun rasik prevee maka nesesita duni Governu iha devér atu kria.
Tuir Konstituisaun artigu 124 (Tribunál Supremu Justisa nian), nu’udar órgaun boot liu iha órgaun ierarkia tribunál judisiál hothotu ninian, no mós fó garantia atu aplika lei oin ida de’it ho jurisdisaun iha nasaun tomak nia laran.
Kompete mós ba Tribunál Supremu Justisa nian atu administra justisa ba buat ne’ebé kona-ba lia jurídiku-konstitusionál no eleitorál.
Prezidente-Repúblika mak foti Prezidente Tribunál Supremu Justisa nian, ne’ebé hetan hili husi juís sira iha Tribunál Supremu Justisa nian, ba tinan haat nia laran.
Antes ne’e, Prezidente Tribunál Rekusu, Afonso Carmona, dehan kandidatu admitidu ba vaga rekrutamentu STJ no Tribunál Rekursu sei tuir teste iha 21 Setembru tinan ne’e.
Notísia relevante: Aplikante na’in-66 konkorre ba vaga Juíz STJ no TR
Jornalista: Nelson de Sousa
Editora: Maria Auxiliadora
