Konstrusaun Sentru Haki’ak Fahi iha Suku Dilór besik konkluidu

VIKEKE,  14 Setembru  2026 (TATOLI)—Xefe Suku Dilór, Postu Administrativu Lakluta, Munisípiu Vikeke, Jacinto Ximenes, informa konstrusaun Sentru Haki’ak Fahi Luhan  husi Programa Nasionál Dezenvolvimentu Suku (PNDS) iha Suku Dilór besik konklui ona.

“Kona-ba obra adisionál husi PNDS ba tinan 2025, ita-nia prosesu konstrusaun daudaun ne’e kontinua la’o. Obra fízika ita atinje ona 90%. Ami garante katak obra ne’e ita sei entrega ba grupu benefisiáriu iha fulan-Novembru 2026,” Jacinto ba TATOLI iha Postu Lakluta, Segunda ne’e.

Autoridade suku ne’e haktuir kalén taka hotu, cor hotu ona, sei falta taka kalén haketak fahi nian mak seidauk.

“Konstrusaun uma nian hotu ona, hela kalén ida atu haketak fahi nian mak seidauk, tanba kalén ne’e ami sei sosa iha Surabaya, Indonézia. Tan ne’e, agora ami tenke hein kalén referidu. Kuandu kalén to’o tiha ita bele taka hotu ona,” nia relata.

Jacinto informa bainhira obra ne’e hotu hahú fornese fahi ba iha Sentru Haki’ak Fahi hodi grupu sira haki’ak no tau-matan tanba grupu mak sei jere sentru referidu.

Tuir nia katak iha etapa dahuluk sei haki’ak fahi hamutuk sanulu (10), inan ualu (8) no aman rua (2).

Obra ne’e kompostu husi uma medida 24×12 ida, medida uma 7×8 ida no uma ida ho medida 5×5,  instalasaun bee ba fahi luhan no kompleta ho morru protesaun. Obra referida gasta orsamentu adisionál hamutuk $53.400,00 ne’ebé konstrui husi badaen lokál sira iha Suku Dilór.

Jornalista: Vitorino Lopes da Costa

Editór: Xisto Freitas da Piedade