Kooperativa tolu husi Vikeke sei aprezenta produtu lokál iha Expo ASEAN
VIKEKE, 14 Setembru 2026 (TATOLI)—Koordenadór Sekretáriu Estadu Kooperativa (SEKoop) Munisípiu Vikeke, Albino da Costa Guterres, informa kooperativa tolu iha Munisípiu Vikeke sei aprezenta produtu lokál Mina-Nuu, Produtu Super Uut no Foos-Rai ba iha Dili Rejionál Kooperativa Konferénsia no Diálogu ba Tinan 2026 no Association of Southeast Asian Nations (ASEAN-sigla Ingleza) Kooperativa Expo iha Timor-Leste ne’ebé sei hala’o iha 01-04 Outubru tinan ne’e.
“Expo ASEAN ne’e sai oportunidade ba kooperativa sira hodi promove sira-nia produtu lokál tanba nasaun sira husi ASEAN mós sei partisipa,” Albino da Costa Guterres ba TATOLI, iha Postu Vikeke Vila, Segunda ne’e.
Nia haktuir Vikeke kooperativa hamutuk 23, maibé barak laiha produtu, entaun kooperativa tolu mak daudaun sira iha produtu atu reprezenta kooperativa sira iha Munisípiu Vikeke iha Expo ASEAN”.
“Dili Rejionál Kooperativa sei sai hanesan plataforma nivel aas no ho parte interesadu oioin atu halo diálogu kona-ba futuru dezenvolvimentu kooperativa iha Sudeste Aziátiku. Konferénsia Kooperativa Rejionál sei konsentra ba troka esperiénsia no pratika di’ak, aborda asuntu no oportunidade polítika prinsipál sira, promove inovasaun no modelu ekonomia sustentável, hametin kooperasaun iha nivel ministeriál, no prodús rekomendasaun pratika ba setór kooperativa,” Albino informa.
Kooperativa tolu ne’ebé sei aprezenta produtu lokál iha Expo ASEAN maka hanesan Kooperativa Builale husi Postu Ossú, aprezenta Produtu Super Uut, Kooperativa CCTM husi Postu Vikeke Vila, aprezenta mina-nuu no mina virjén no Kooperativa C-PHF husi Postu Uatulari, aprezenta produtu foos-rai lokál (foos mean, foos-mutin no foos-metan).
Jornalista: Vitorino Lopes da Costa
Editór: Xisto Freitas da Piedade
