Parlamentu Nasionál inisia abertura sesaun lejizlativa dahaat iha aban
DILI, 14 Setembru 2026 (TATOLI) – Parlamentu Nasionál inisia, aban, sesaun abertura solene ba sesaun lejizlativa dahaat, iha lejizlatura daneen nian.
Reuniaun plenária sei hahú iha tuku 9h00 dadeer, dirije husi Prezidente Parlamentu Nasionál, Maria Fernanda Lay, hafoin bankada parlamentár sira hato’o ninia intervensaun.
Tuir ajenda ne’ebé iha, sesaun ne’e sei marka prezensa husi Prezidente Repúblika, José Ramos-Horta, hodi dirije mensajen ba Parlamentu Nasionál.
Eventu ne’e sei partisipa husi Primeiru-Ministru, Xanana Gusmão, Prezidente Tribunál Rekursu, Afonso Carmona, no konvidadu sira seluk.
Prezidente Komisaun A ne’ebé trata Asuntu Konstitusionál no Justisa, Natalino dos Santos, espera katak ho sesaun foun ne’e Parlamentu bele hala’o serbisu di’ak liután ba povu tuir prioridade sira ne’ebé iha.
Nia salienta katak Komisaun ninia kompeténsia haree liu ba lei sira, asuntu justisa, fiskalizasaun administrasaun públika tomak, direitu umanu, anti-korrupsaun, no direitu fundamentál povu nian.
Tuir nia, iha sesaun foun ne’e, Komisaun tau prioridade diskusaun ba projetu lei alterasaun Kámara Konta, Kontra Ordenasaun, Protesaun Dadus, proposta Lei Siberseguransa ho pakote lei sira seluk ne’ebé daudaun iha meza Komisaun.
Lembra katak períodu resesu Parlamentu Nasionál komesa iha 15 Jullu no tama fali iha 15 Setembru 2026.
Tuir Konstituisaun artigu 99, sesaun lejizlativu lima no sesaun lejizlativa idaidak iha durasaun tinan ida nian. Periódu normál funsionamentu Parlamentu rejimentu mak define.
Iha rejime Parlamentu Nasionál iha artigu 45 (Sesaun Lejizlativa), períodu normál funsionamentu Parlamentu nian hahú iha 15 Setembru no ramata iha 15 Jullu. Tanba ne’e, Parlamentu iha lejizlatura daneen ida-ne’e kompleta ona sesaun lejizlativa datoluk.
Jornalista: Nelson de Sousa
Editora: Maria Auxiliadora
