SEKOMS prepara ona rejime subvensaun públika ba mídia sira iha TL
DILI, 14 Setembru 2026 (TATOLI)—Sekretáriu Estadu Komunikasaun Sosial, Exepdito Dias Ximenes, hateten Governu hahú prepara ona rejime subvensaun públika ne’ebé aprova ona ba mídia sira iha Timor-Leste.
“Ohin, Prezidente no Diretór Ezekutivu Konsellu Empreza (CI), ami ko’alia kona-ba oinsá servisu hamutuk ba oin no oinsá Governu nia preparativu ba rejime subvensaun públika ne’ebé Governu aprova ona ba mídia sira iha Timor-Leste. Sira mós hatoo sira-nia parser. Ha’u mós husu sira atu inklui membru dirijente balun husi konsellu emprensa atu hola parte iha ekipa ne’ebé mak atu halo avaliasaun ba mídia sira-ne’ebé mak bele simu no mídia sira-ne’ebé mak labele simu,” Exepdito Dias Ximenes hateten ba jornalsira sira, iha Palasiu Governu, ohin.
Ohin, nia hateten, sira hato’o sira-nia pareser katak iha kritériu sira-ne’ebé mak Konsellu Imprensa rejista mak liuliu ba mídia sira-ne’ebé mak la’o ho di’ak no sira balun la’o ladun di’ak.
“Konsellu Imprensa sira mai atu haree besik to’o ne’ebé ona kona-ba ita-nia revizaun ba lei komunikasaun sosiál. Katak, prosesu ne’e la’o besik atu hotu ona no iha fulan rua ba kotuk ami halo diskusaun ho mídia-na’in sira kona-ba pareser. Daudaun ne’e, tekniku sira halo hela prosesu. Ita hein katak fulan-Outubru ka Novembu ne’e, tama ona iha Konsellu Ministru, nune’e bele hetan apresiasaun husi ne’eba. Molok tinan oin ne’e, bele to’o iha Parlamentu Nasionál atu bele halo audiénsia públika,” nia dehan.
Iha fatin hanesan, Prezidente Konsellu Imprensa, Antonio Cesar Mali, hateten sorumutu ne’e ko’alia kona-ba mídia sira-nia interese katak fulan ida liu ba alterasaun kona-ba lei komunikasaun sosiál ninia progressu ne’e to’o iha ne’ebé ona, tanba lei ne’e mak sei regula jornalista sira hotu.
“Depende resposta husi SEKOMS katak lei ne’e komesa la’o daudaun ona, antes tinan oin ne’e lori ona ba Parlamentu Nasionál atu nune’e PN foti ona desizaun. Entaun, atu hateten ba jornalista katak lei komunikasaun sosiál ne’ebé mak ita hotu kontribui, ninia estabelesimentu mak enkontru lubuk ida halo ona ho asosiasaun mídia sira, ne’ebé hato’o sira-nia opiniaun no kontribuisaun tanba lei ne’e mak regula ita,” nia afirma.
Konsellu Imprensa halo audiénsia ho SEKOMS ne’e, aleinde ko’alia kona-ba lei komunikasaun sosiál no informa ba SEKOMS katak tempu badak ne’e Konsellu Imprensa sei halo vizita ba Jakarta-Indonesia hodi hasoru nia omólogu sira.
Planu ne’e atu dezenvolve kapasidade no rekursu ne’ebé mak iha atu bele regulariza mídia sira iha Timor-Leste, liuliu oinsá halo monitorizasaun no mós analiza ba mídia sira entaun presiza rekursu ne’ebé mak natoon no avansadu liu.
Kona-ba lei komunikasaun sosiál, nia dehan, CI hato’o pareser no informasaun ba SEKOMS presiza servisu hamutuk ho Konsellu Imprensa atu identifika mídia sira-ne’ebé mak atu simu subvensaun, tanba Prezidente Republika Jose Ramos-Horta mós hato’o nia hanoin katak subvensaun ne’e di’ak ba media maibé tenke trata ho didi’ak, atu subvensaun ne’e bele atinje duni objetivu ne’ebé mak ema hotu hakarak.
Jornalista : Felicidade Ximenes
Editór : Cancio Ximenes
