Delegasaun jornalista ASEAN aprofunda koñesimentu kona-ba kultura Guangxi 

XINA, 15 Setembru 2026 (TATOLI) – Delegasaun jornalista sira husi Asosiasaun Nasaun Sudeste Aziátiku (ASEAN) nia hahú série vizita iha Rejiaun Guangxi Zhuang, Xina, hodi esplora múzika étika ne’ebé riku arte, no istória husi ema lokál sira.

Atividade sira ne’e marka envolvimentu dahuluk iha kampu ba delegasaun mídia sira hafoin to’o iha Nanning iha segunda-feira, 14 Setembru 2026, tuir viajen naruk sira husi idaidak nia nasaun.

Bainhira to’o iha fatin vizita, delegasaun hetan benvindu husi estudante na’in-17 ne’ebé hatais roupa tradisionál ugrupu étnika oioin husi Guangxi. Sira kumprimenta partisipante sira ho knananuk sira no tara prezente ho naran “Xiuqiu” ka bola bordadu tradisionál sira ne’ebé koñesidu hanesan símbolu sorte di’ak nian.

Hafoin ne’e, jornalista sira vizita Muzeu Múzika Étnika Guangxi, ne’ebé rai instrumentu múzika tradisionál oioin no serve hanesan instalasaun universitáriu ida hodi hatudu kultura muzikál sira Guangxi no Sudeste Aziátku nian.

Durante vizita, estudante sira hatudu instrumentu tradisionál oioin, hahú husi tambór, yunluo gong, sinu Bianzhong, no ‘Sheng ka instrumentu ne’ebé huu de’it no tianqin nu’udar instrumentu tradisionál ho tali ne’ebé toka husi estudante sira ne’ebé uza roupa tradisionál Zhuan.

Iha biban ne’e, hatudu mós ba delegasaun oinsá lesung sira uza hodi kria ritmu muzikál sira no haree kolesaun máskara ai tradisionál sira ne’ebé uza iha rituál espesífiku sira. Adisionalmente, muzeu hatudu traje tradisionál oioin husi grupu étnika sira Guangxi nian, inklui Zhuang, Dong, no Yao.

Muzeu nia kolesaun la limita ba instrumentu Xinés sira. Instrumentu múzika lubuk ida husi nasaun Sudeste Aziátiku sira mós halo parte iha kolesaun ne’e, inklui gamelan, gendang no angklung husi Indonézia. Partisipante sira iha oportunidade atu koko toka angklung.

Diretór Sentru Edukasaun Internasionál Unversidade Arte Guangxi, Zhao Ke, hatete katak mídia hala’o papél krusiál ida hodi hatudu Guangxi hanesan sentru ba interkámbiu entre Xina no nasaun sira ASEAN nian.

“Liuhusi meiu komunikasaun sosiál, ami bele promove papél Guangxi nian hanesan sentru interkámbiu entre Xina ho ASEAN. Ami mós hein atu kolabora ho nasaun sira ASEAN nian hodi haburas aprendizajen mútua, liuliu iha área arte no múzika nian”, Zhao Ke hatete ba Tatoli, iha Unversidade Arte Guangxi.

Nia esplika katak universidade estabelese ona parseria ho instituisaun edukasionál sira iha rejiaun ASEAN tomak inklui iha Indonézia no inkorpora gamelan iha atividade no festivál múzika internasionál sira.

Nia espera katak interkámbiu sira-ne’e sei hakat liu de’it introdús instrumentu muzikál sira no evolui ba kolaborasaun luan liu no troka artista sira entre Guangxi no nasaun sira ASEAN nian.

Universidade Arte Guangxi daudaun simu estudante internasionál sira husi nasaun ASEAN oioin, inklui Kamboja, Indonézia, Laos, Myanmar, Filipina, Singapura, Tailándia, no Vietname.

Maibé, Zhao nota katak universidade seidauk estabelese parseria no mós seidauk iha estudante ruma husi, Timor-Leste. “Espesifikamente kona-ba TimorLeste, ami seidauk iha parseria ruma ka estudante sira husi nasaun. Ami hein katak ida-ne’e sei muda iha futuru”, nia hatete.

Universidade Arte Guangxi maka instituisaun ensinu superiór komprensivu ualu iha Xina ne’ebé dedika ba arte sira. Nia opera universidade tolu mak Nanhu, Xiangsihu, no Guilin, ne’ebé kobre área totál maizumenus ektare 40.7.

Muzeu Múzika Étnika Guangxi, rasik harii iha Juñu 2015, lokaliza iha Universidade Nanhu. Ho luan maizumenus metru kuadradu 2.600, muzeu ne’e loke ba públiku iha Outubru 2018 no iha kolesaun ida ho sasán ka konjuntu liu 1.600, hahú husi instrumentu múzika, livru knananuk tradisionál, partitura, materiál audiovizuál sira no seluk tan.

Muzeu ne’e mós iha kolesaun ida ne’ebé boot liu husi instrumentu muzikál sira ASEAN nian entre universidade xineza sira, ne’ebé serve hanesan plataforma ida hodi hatudu múzika étnika Guangxi nian no mós kultura muzikál sira husi Sudeste Aziátiku.

Hafoin vizita refere delegasaun ne’e kontinua bá Muzeu Rejiaun Autónoma Guangxi Zhuang nian hodi aprende kona-ba viajen istórika no moris husi povu Guangxi nian iha era sira hotu.

Iha muzeu, jornalista sira haree relíkia oioin ne’ebé ilustra oinsá ema sira iha pasadu moris no harii sivilizasaun sira iha rejiaun Guangxi.

Kolesaun sira ne’ebé hatudu inklui imajen sira no eskultura sira iha fatuk, sanan tunu nian, frasku sira, pontu-seta sira, katana sira, no sasán sira seluk ho signifikadu istóriku.

Konstrusaun ba Muzeu Rejiaun Autónoma Guangxi Zhuang nian hahú iha tinan 1934, ida-ne’e maka muzeu ida ne’ebé kompriensivu, iha nivel rejiaun autónoma ne’ebé foka ba istória no arte, no klasifika hanesan muzeu nasionál klase dahuluk iha Xina.

Edifísiu nia arkitetura reflete karaterístika kulturál Zhuang nian enkuantu integra espasu sira ba relíkia kulturál sira, espozisaun sira, teknolojia moderna, no instalasaun sira atividade kulturál nian.

Jornalista: Arminda Fonseca  

Editora: Maria Auxiliadora