Ema deskoñesidu sobu armazein eskola EBF Ritabou
BOBONARU, 15 Setembru 2026 (TATOLI)-Ema deskoñesidu tama Eskola Bázika Filiál (EBF) Ritabou, postu dministrativu Maliana, munisípiu Bobonaru, hodi na’ok suratahan HVS kaixa 17, depois sobu odamatan armazein no hafo’er sala ensinu-apredizajen iha eskola ne’e.
Koordenadora interina EBF Ritabou, Loudes Mutu de Jesus, hatete katak insidente ne’e akontese iha semqnq kotuk durante tempu kalan.
“Ema deskoñesidu mai sobu tiha odomatan armazein, depois tama iha laran no foti suratahan HVS kaixa 17. Materiál sira seluk sira la book. Ha’u hanesan responsavel eskola sente triste tebes, tanba sasán hirak ne’e rai ba estudante no ami profesór sira atu uza halo avalisaun no aktividade seluk tan”, nia informa ohin.
Lourdes dehan katak parte eskola aprezenta ona keixa ba autoridade seguransa no hato’o mós informasaun ba lideransa komunitária no Diresaun Servisu unisipál edukEasaun, tanba kazu hanesan ne’e akontese beibeik ona.
Nia hatete katak situasaun ne’e mosu tanba EBF Ritabou laiha pesoál seguransa atu asegura no proteje fasilidade eskola, liuliu iha tempu kalan.
“Ida ne’e akotense filafila. Iha tempu koordenadór sesante sira-nia mós akontese hanesan ne’e. Horikalan, segunda (14/09/2026), sira tama tan pré-eskolár no foti tan HVS ne’e kaixa lima. Materiál seluk sira la book, sira husik odomatan loke hela ba oin. Ami sei kria lai enkontru ho inan-aman atu buka solusaun. Hakarak ka lakohi tenke iha seguransa, nune’e eskola labele mosu problema hanesan ne’e”, nia dehan
Iha sorin seluk, Xefe Suku Ritabou, Maximiano dos Santos Araújo, lamenta ho insidente ne’e hafoin rona informasaun husi dirijente eskola.
Maximiano kondena maka’as asaun ne’e no konsidera katak hahalok ne’e la di’ak, tanba eskola mak fatin atu hanorin no prepara labarik sira ba futuru.
“Ha’u bá haree rasik odomatan ne’e tau xave tolu, más sira selok sobu tiha foti surat tahan atu halo preperasaun ba ita-nia oan sira atu ezame. Ne’e ema sira hanoin laiha, ida-ne’e ita bele dehan ema mal edukadu. Eskola ne’e ita hotu nian”, nia dehan.
Maximiano afirma katak ba oin autoridade sei buka tuir autór sira no, se identifika sei implemneta sansaun tuir regulamentu suku.
“Ita nia suku iha ona tara-bandu. Babain buat ki’ik ita halo hela, tanba aktu ida-ne’e la merese ita atu halo, tanba eskola ne’e ita hotu nian, la’os ema ida ka rua nia de’it”, nia dehan.
Maximiano rekomenda ba parte kompetente atu rekruta pesoál seguransa hodi halo kontrolu ba proteje fasilidade eskola, liuliu iha tempu kalan. “Bainhira ema sobu pré-eskolár ne’e, ita konvida sira husi edukasaan munisípiu mai hotu iha ne’e. Ita ko’alia hamutuk atu haree asuntu ne’e. Ha’u husu ba komunidade hotu-hotu iha devér tau-matan ba eskola ida-ne’e, tanba ita-nia oan sira mak bá eskola iha ne’ebá. Ba ema ne’ebé durante hanoin aat karik, para tiah ho ida-ne’e”, nia afirma.
EBF Ritabou akumula estudante na’in 500-resin husi primeiru to’o sestu anu.
Notísia relevante: EBF Ritabou laiha sala Biblioteka no moru protesaun
Jornalista: Sergio da Cruz
Editora: Maria Auxiliadora
