Enkontru entre Embaixadór Nasaun Membru ASEAN, Indonezia no Malázia konfirmadu partisipa iha DRCCMD
DILI, 15 Setembru 2026 (TATOLI)–Konfirmadu Indonézia no Malázia partisipa iha enkontru entre Embaixadór Nasaun Membru Association of Southeast Asian Nations (ASEAN), kona-ba preparasaun realizasaun Díli Regional Cooperative Conference and Ministerial Dialogue (DRCCMD) 2026, iha Timor-Leste, ne’ebé ho tema “Hakbiit Komunidade sira, Liga Nasaun sira”.
La konfirmadu atu partisipa mak Vietname, Mianmar, Singapura no nasaun seluk sei hein kontaktu.
“Ita sei realiza Dili Regional Cooperative Conference and Ministerial Dialogue 2026, ne’ebé ida-ne’e mak ohin halo briefing ho Embaixadór sira, liuliu Nasaun Membru ASEAN nian. Iha enkontru ne’e, parte hotu-hotu iha esperansa hakarak susesu iha Konferénsia Kooperativa Rejionál Dili 2026 ne’e,” Sekretáriu Estadu Kooperativa (SEKoop), Arsénio Pereira da Silva, dehan ba jornalista sira iha Palm Spring Hotel Fatuhada, Dili,Tersa ne’e.
Governante ne’e subliña ohin enkontru ikus maibé komisaun hamutuk ho SEKoop kontinua kontatu hodi konfirma Nasaun ASEAN ne’ebé seidauk konfirmadu.
Iha sorin seluk, Raden Sakunto nu’udár PAKSI Kuasa Usaha A.I. Kedutaan Besar, Dili, hateten ohin Membru ASEAN sira halo enkontru hodi diskute reprezentante sira-ne’ebé mai tuir Dili Regional Cooperative Conference and Ministerial Dialogue 2026.
“Ohin ita hasoru-malu ho Membru ASEAN sira hodi ko’alia kona-ba atividade ne’ebé sei hala’o iha 01-04 Outubru tinan-ne’e, ne’ebé foka ba kooperasaun ho nasaun viziña sira, partikularmente iha ASEAN nia laran. Indonézia rasik konfirmadu no sei partisipa. Ministru Kooperasaun Indonézia, Ferry Juliantono mak sei partisipa Sesaun hotu-hotu iha atividade ne’e,” nia dehan.
Nia hatutan Ministru Kooperasaun Indonézia ne’e fahe nia esperiénsia liga ho formasaun kooperasaun no oinsá setór kooperasaun iha Indonézia. Aleinde ne’e, Ministru Kooperasaun Indonézia ne’e sei asina Nota Entendimentu ho Sekretáriu Estadu kooperativa Timor-Leste.
Konferénsia Kooperativa Rejionál Dili no Diálogu Ministeriál 2026 sei hala’o hanesan eventu rejionál ho eskala boot, ho parte interesada oioin durante loron haat. Programa ne’e kombina Sesaun Plenária, Diálogu Ministeriál ida, no Enkontru Bilaterál sira, ho envolvimentu kulturál no oportunidade rede sira.
Loron dahuluk simu delegasaun sira bainhira to’o iha Timor-Leste. Loron daruak loke dalan ba partisipante hotu-hotu ne’ebé rejistadu ona, hakat husi Sesaun Abertura ba Sesaun Espesiál ida kona-ba Integrasaun Ekonómika ASEAN Timor-Leste nian no iha Sesaun Plenária tolu hanesan Sesaun Plenária ida, kona-ba polítika no enkuadramentu nasionál sira ba integrasaun kooperativa rejionál; Sesaun Plenária rua, kona-ba fó kbiit ba kooperativa sira liuhosi ajuda finanseira no ekosistema bankáriu sira; no Sesaun Plenária tolu kona-ba kampeaun kooperativa sira bazeia iha komunidade no transformasaun sosioekonómika, molok loron taka sei hala’o abertura ofisiál ba Expo Kooperativa ASEAN 2026.
Loron datoluk, tama bá Diálogu Ministeriál ida, interkámbiu nivel aas ida-ne’ebé taka entre Ministru sira no Xefe Delegasaun sira ne’ebé harii iha Plenária III hodi buka dalan ba parseria rejionál no komún sira kooperasaun transfronteirisu, tuir fali ho enkontru bilaterál sira ba envolvimentu espesífiku ba nasaun. Loron dahaat, delegasaun sira sai hosi Timor-Leste bá idaidak nia nasaun.
Jornalista: Osória Marques
Editór: Xisto Freitas da Piedade
