MESSK sensibiliza kritériu ingresu espesiál iha Oekusi atu asesu UNTL no IPTL

OEKUSI, 15 Setembru  2026 (TATOLI) –  Ministériu Ensinu Superór Siénsia no Kultura (MESSK), tersa ohin, hala’o sensibilizasaun koba-ba kritériu sira ba entidade sira iha Rejiaun Administrativa Espesiál Oekusi Ambeno (RAEOA), atu asesu ingresu espesiál ba Universidade Nasionál Timor-Leste (UNTL) no Institutu Públiku Timor-Leste (IPTL) tinan akadémiku 2027.

Diretór Nasionál Ensinu Superiór iha MESSK, Higino Alves informa katak desiminasaun ne’e ba munisipíu 13 inklui RAEOA no Atauru, bazeia dekretu-lei númeru 24/2025, loron 30 fulan-Jullu, nu’udar programa rutina atu fasilita estudante sira oinsá bele asesu ba ensinu superiór; universidade no institutu públiku nian.

“Disemina informasaun fasilita entidade hotu, aatu hatene, oinsá bele asesu ingresu ensinu superiór ba estudante sira futuru bele tama iha UNTL no IPTL, ho nia rejime espesiál no rejime jerál,” nia hateten iha salaun alfándega Oekusi, ohin.

Nia espera, ho prezensa, autoridade lokál suku 20, dirijente eskola sira, jestór sub-rejiaun haat inklui autoridade RAEOA, bele kontinua partilla informasaun ba estudante no populasaun sira.

Tanba iha rejime ida relasaun ho knaar xefe suku sira-nia, bazea ba MoU ne’ebé antes ne’e selebra ona entre MESSK ho MAE, sub-rejime ida mak Hakbit ne’e katak, nia deklarasaun mai husi xefe suku sira no Ministériu Solidariedade Sosiál no Inkluzaun (MSSI) iha munisipíu idak-idak.

“Tan ne’e ohin xefe suku sira maioria marka prezensa atu hatene, ba futuru fornese deklarsaun karik, ba ema ne’ebé merese duni atu asesu ba ingresu espesiál ne’e,” nia afirma.

Apelu ba transparénsia no evita familiarizmu

Prezidente Autoridade RAEOA, Régio da Cruz Salu, rekomenda katak, iha prosesu tenke garante transparánsia bazeia valór estudante sira-nian.

“Prosesu ne’e naruk, maibé ha’u husu tenke transparénsia bazia ba morál atu lori Oekusi sai lidér barak iha futuru, labele tanba nia partidu hanesan, maibé bezeia ba notas valór ne’ebé estudante nia esforsa, tanba dalruma balu krítika katak, familiarizmu, ida-ne’e tenki evita atu labele akontese iha prosesu ingresu espesiál atu asesu ensinu superór iha 2027 ne’e,” nia rekomenda.

Tanba ne’e. nia apela ba dirijente eskola sira no mós autoridade lok’al suku 20 atu kontinua fahe informasaun ba públiku, nune’e ema hotu bele asesu informasaun no iha koñesimentu atu prepara hodi partisipa.

Notísia relevante:Prosesu Ingresu Kandidatu Estudante Ba UNTL Kompeténsia MESSK

Jornalista: Abílio Elo Nini

Editór: Rafael Ximenes de A. Belo