Postu Saúde Baulale hahú ona iha faze konstrusaun

VIKEKE, 15 Setembru 2026 (TATOLI)–Xefe Suku Irabin de Baixo, Postu Administrativu Uatukarbau, Munisípiu Vikeke, José Baptista do Carmo, informa konstrusaun Postu Saúde Baulale, Suku Irabin de Baixo, daudaun ne’e iha faze konstrusaun.

“Kona-ba konstrusaun Postu Saúde Baulale ne’ebé konstrui iha ami-nia suku oras-ne’e empreza responsável hala’o hela konstrusaun. Konstrusaun ne’e empreza kontratu ami-nia abitante iha suku laran mak halo servisu konstrui postu saúde,” José Baptista do Carmo ba TATOLI, iha Suku Irabin de Baixo, Tersa ne’e.

José relata konstrusaun ba obra ne’e progresu servisu ke’e fondasi  hotu ona, no hafoin hada fondasi hotu sei kontinua ateru.

“Ba kontrusaun ne’e ami sempre akompaña empreza implementadór sira no badaen sira halo servisu. Ne’ebé, ita haree progresu servisu atinje 25%-resin ona,” nia esplika.

José informa Postu Saúde Baulale bainhira hotu sei benefísia tebes populasaun Suku Irabin de Baixu ne’ebé hela iha área Baulale tanba durante ne’e sira atu asesu postu saúde tenke la’o bá Sentru Saúde Uatukarbau ne’ebé ho distánsia kilómetru ida resin.

“Sei benefísia mós komunidade husi suku seluk hanesan Bahatata, Afaloikai, Loi-Ulu, Irabin de Cima no Uani-Uma. Tanba komunidade husi suku lima ne’e mós hela iha área Baulale entaun fásil asesu fasilidade saúde,” nia haktuir.

Tuir dadus, popopulasauSuku Irabin de Baixo ho totál hamutuk 2.625, totál aldeia hitu mak hanesan Taradiga, Uatodere, Beturia,  Macausa, Macaqui,  Laculoroho’o no Taradai.

Entretaantu, projetu Postu Saúde Baulale,  Irabin de Baixo, konstruidu ho Orsamentu Jerál Estadu  (OJE) 2026,  liuhusi Planu Dezenvolvimentu Integradu munisipál (PDIM) Vikeke, valór kontratu totál hamutuk $148.009,99, responsabiliza husi Empreza Makweda Unip. Lda, hahú konstrusaun fulan-Jullu 2026 no sei ramata iha Janeiru  2027.

Jornalista: Vitorino Lopes da Costa

Editór: Xisto Freitas da Piedade